Zelenskıynıñ Qırım temsilcisi Keriç köprü sebebinden «Qırım» sanktsiyaları quvetleştirile bile, dep tahmin ete
«Mence, Qırım sanktsiyaları meselesini Ukraina seviyesinde pek ciddiy şekilde muzakere etmek kerekmiz. Belki, qanunlarğa belli bir deñişmeler kirsetilir. Belki, sanktsiyalarnı yerine ketirmegenlerniñ mesüliyetke çekilmesi baqılır, ğarbiy ortaqlar Ukraina buña cevap berecegini añlamaq kerek», – dep qayd etti Korineviç.
Korineviçniñ fikirince, «al-azırda Qırım boyunca sanktsiyalar vaziyetini umumen deñiştirecek ve eyiliştirecek meydançıq bar».
Daimiy vekilniñ qayd etkenine köre, onıñ fikirince, Ukrainanıñ Keriç köprüniñ qurucılığına keder etmege imkânı yoq edi.
«Ne yazıq ki, Rusiye işğal etilgen ukrain Qırımını vaqtınca kontrol etkenini aytmağa mecburmız. Ukrainanıñ bu köpürniñ qurucılığına keder etmege kerçekten imkânı yoq edi. Diger taraftan, uquq qoruyıcı organlarında, Qırım Muhtar Cumhuriyetiniñ prokuraturasında bu köpürniñ qanunsız qurucılığına, hususan Qara ve Azaq deñizleriniñ ekologiyasına ketirilgen zararğa dair cinaiy dava açılğan edi. Bu köpürniñ qurucılığına çetel şirketleriniñ celp etilgenini de bilemiz», – dedi Korineviç.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
2014 senesi iyül ayında Ukraina ükümeti ilhaq etilgen Qırımdaki bütün limanlarnıñ işini resmiy şekilde toqtatqan edi.