Քերոբյանի պաշտպանը որոշ մանրամասներ է ներկայացրել հարուցված գործի ընթացքից
ՀՀ էկոնոմիկայի նախկին նախարար Վահան Քերոբյանի պաշտպան Տիգրան Եգորյանի պնդմամբ՝ իր պաշտպանյալի գործով ի սկզբանե առաջ է քաշվել մի վարկած և ամեն գնով ջանք է գործադրվում դրա քարոզման ու հաստատման համար։ «Արմենպրես»-ի հաղորդմամբ՝ մարտի 7-ին հրավիրված ասուլիսին Տիգրան Եգորյանի ներկայացմամբ՝ ըստ Քննչական կոմիտեի հսկայածավալ օպերատիվ հետախուզական աշխատանքներ են կատարվել՝ պարզելով, որ Էկոնոմիկայի նախարարության պաշտոնատար անձինք […]
The post Քերոբյանի պաշտպանը որոշ մանրամասներ է ներկայացրել հարուցված գործի ընթացքից first appeared on MediaLab Newsroom-Laboratory.
ՀՀ էկոնոմիկայի նախկին նախարար Վահան Քերոբյանի պաշտպան Տիգրան Եգորյանի պնդմամբ՝ իր պաշտպանյալի գործով ի սկզբանե առաջ է քաշվել մի վարկած և ամեն գնով ջանք է գործադրվում դրա քարոզման ու հաստատման համար։
«Արմենպրես»-ի հաղորդմամբ՝ մարտի 7-ին հրավիրված ասուլիսին Տիգրան Եգորյանի ներկայացմամբ՝ ըստ Քննչական կոմիտեի հսկայածավալ օպերատիվ հետախուզական աշխատանքներ են կատարվել՝ պարզելով, որ Էկոնոմիկայի նախարարության պաշտոնատար անձինք ինչ-որ նախնական համաձայնությամբ, դիտավորություն ունենալով կոնկրետ մի կազմակերպությանն օժանդակելու ընդդեմ մյուսի, իրականացրել են հակամրցակցային քաղաքականություն և գործողություններ, խախտել են գնումների մասին օրենքը, ՀՀ կառավարության որոշումները, որի արդյունքում մի կազմակերպության դուրս են հանել մրցակցությունից։
(Խոսքը վերաբերում է տվյալ դեպքում «Սիներջի» ընկերության համար մրցույթում հաղթանակի ապահովմանն ընդդեմ նրա մրցակցի՝ «Հարմոնիա»-ի, չնայած վերջինս ավելի ցածր գին էր առաջարկել)։
«Եվ այս կապակցությամբ մի շարք անձանց ձերբակալել են, այնուհետ և կալանավորել են մի քանիսին, և հանգուցալուծումն, ըստ էության, նաև նախկին նախարար Վահան Քերոբյանի ձերբակալությունն ու նրա նկատմամբ խափանման միջոցի կիրառումն է եղել։ Այս ողջ ընթացքում մենք դիտարկել ենք, որ, փաստորեն, այդ հսկայածավալ օպերատիվ-հետախուզական միջոցառումների արդյունքները բավական մոտ են զրոյին»,- համոզմունք հայտնեց փաստաբանը, ում գնահատմամբ
այդ արդյունքները ոչ տպավորիչ ու անարդյունավետ են եղել, իսկ խափանման խիստ միջոցների կիրառումն, ըստ էության, ծառայեցվում է այդ անձանց կողմից ցանկալի ցուցմունքներ տալու հարկադրանքի միջոց՝ սկսելով ձևավորել ի սկզբանե մտածված նարատիվի հիմքեր, ապացույցներ։
Նրա խոսքով՝ նախաքննության մարմինը, կարելի է ասել, չունի բովանդակային այնպիսի հարցեր Քերոբյանին, որոնցից հնարավոր կլինի հասկանալ տեղի ունեցածը բազմակողմանիորեն քննելու, պարզելու ցանկությունը։
Փաստաբանի եզրահանգմամբ՝ այս հանգամանքն ու նախաքննության մարմնի մարտավարությունը ցույց են տալիս, որ ձևավորվել է մի նարատիվ, և անկախ փաստական տվյալներից, ամեն գնով փորձ է արվում մեկնաբանություններ ու տեղեկություններ ամրագրել հենց դրա հաստատման օգտին։
Նա հայտարարեց, որ նույնիսկ օպերատիվ-հետախուզական գործողությունների արդյունքում ձեռք բերված այն փաստերը, որոնք հերքում են այդ վարկածը կամ դրա դեմ են, ապա անտեսվում են։
Եգորյանը համարում է, որ այդ նարատիվը նախաքննության կազմում գործող քննիչների համոզմունքներն ու կարծիքներն են՝ չհիմնավորված որևէ էական փաստական հենքով։
Ըստ նրա՝ նախաքննության մարմինը չի քննարկում որևէ այլ վարկած, ինչն առանցքային նշանակություն ունի, քանի որ նախաքննությունը պետք է լինի բազմակողմանի։
«Քրեական դատավարության սկզբունքների և ստանդարտների շրջանակներում, եթե կա վարկած, որը հավասարապես հնարավոր է առաջ քաշված այլ վարկածի հետ համադրել, ապա դրանցից մեկը կարող է առավելություն ստանալ միայն, երբ կան ծանրակշիռ այնպիսի ապացույցներ և փաստեր, որոնք կասկածներով հերքելը չէ, որովհետև այդ վարկածի նկատմամբ ցանկացած կասկած պետք է փարատվի հօգուտ մեղադրյալների»,-ասաց Եգորյանը։
Անդրադառնալով նախաքննության մարմնի այն հայտարարությանը, ըստ որի որոշում է կայացվել հօգուտ մի ընկերության, որը 3 անգամ ավելի գին է սահմանել, փաստաբանը կարծիք հայտնեց, որ քննիչները բավարար պատկերացում չունեն մրցութային գործընթացից, որտեղ որոշիչը միայն գինը չէ, այլ նաև դրա ու որակի հարաբերակցության արդյունքում կատարված ընտրությունը։
Քերոբյանի պաշտպանը զրոյական համարեց վերլուծական մոտեցումը նախաքննական փուլում և դրա նկատմամբ դատախազական հսկողությունը։
Փետրվարի 14-ին Վահան Քերոբյանը հայտնեց Էկոնոմիկայի նախարարի պաշտոնից ազատման մասին: Փետրվարի 15-ին հայտնի դարձավ, որ Վահան Քերոբյանին մեղադրանք է առաջադրվել պաշտոնական լիազորությունները չարաշահելու հոդվածով՝ «Սիներջի» ընկերության հետ կապված գործով։ Քերոբյանը մեղադրանքը չի ընդունում:
Նրա նկատմամբ 2 ամիս ժամկետով տնային կալանքը որպես խափանման միջոց կիրառելու միջնորդության վերաբերյալ որոշումը Հակակոռուպցիոն դատարանը հրապարակեց փետրվարի 16-ին:
The post Քերոբյանի պաշտպանը որոշ մանրամասներ է ներկայացրել հարուցված գործի ընթացքից first appeared on MediaLab Newsroom-Laboratory.