Полады раськензэ тевенть (эрзя)
Олег Буров Покш Березникень буень парень тейницясь келейстэ содави аволь ансяк минек республикасо, ды сонзэ васоло томбалеяк. Эсензэ кедьсэ сон теи, лангс ванозь, оймевтеме чувтонь пелькстнестэ мазый кедьгеть ды кудопотмонь минень-сюнот, конатнень рамсить Мордовиянь эрицятне ды инжетне. Салтомас ды симемапельс тумонь парть, чакшкеть, подност, менажницат, керсемань лазт, салатникть – те сонзэ кедьсэ теезь теевксэнь аволь весе пурнавксось. Чувтосто теевксэнь теемас Олег кундась аволь стяко – те сонзэ зярыя раськень эрямонь тев. Сень лангс апак вано, што технологиятне кеместэ совасть минек неень шкань эрямос ды малав полавтызь физической важодеманть, Буровтнень тевесь эри течинь чис.
«Чувтонть марто важодемантень яван мель эйкакшпингестэ саезь, парень теемантень вечкемась сатотсть монемс покштям пельде. 2014-це иестэ саезь тенень мель яван теке свалшкань важодемантень, — ледстни мастерэсь. – Васня ульнесь стака. Раськень теварсевксэнть ды региононь экономикань, микшнемань ды предпринимательствань министерстванть лезксэст вельде колмо иеде икеле «Мой бизнес» Куншкакуросо монем максозель льготань кредит, кона лездась эрявикс оборудованиянь рамамос. Эсень теевксэнь икелев ютавтомга монем питневтеме лездасть лисемс электронной микшнемань курос».
Ламо иетнень перть Олег Буровонь кастовсь аволь ансяк ёрокчизэ, ды ламо казнетнеяк. Сон свалшкане невти прянзо эсь тевень теицятнень ярмункатнесэ, аволь васенце ие «Территория бизнеса» ды «Лучшие в своём деле» форумтнесэ. Эсь тевень содамонь бойкасто касыця ды содавиксчись ёнкстнэ лездасть сонензэ те иень даволковонь 27-це чистэ васенцеде улемс «Россия» невтемасо-форумсо. Мордовиянь бизнесэнь лия представительтнень марто предпринимательствань отраслянь Чистэ региононь стендсэ сонензэ сатотсь уцясканзо невтемс эсензэ продукциянть.
«Тесэ монемс максовсь улемась токамс эрзянь ды мокшонь ёвксонтень – морязь тумосто теемс эсень теевкст. Минек стендэнь содавтыцятненень мон невтинь те питнев чувтосто кавто парть, конатнень теинь эсень кедьсэ», — корты мастерэсь.
Эряви тешкстамс, Олег васенцекс республикасо нолды тевс чувтонь породатнестэ зярыя пельксэнь човамонть — те лепе, селей, раужо тумо. Те техникасо эсь тевень теицясь теи салатникть, вазат ды сэрей кечеть.