მალხაზ მაჩალიკაშვილი: დაკავებული ვიყავი
„გომბორის უღელტეხილზე დამხვდნენ ძალოვანი უწყების წარმომადგენლები, გადმომსვეს მანქანიდან და წამიყვანეს გურჯაანის მიმართულებით... როცა ვკითხე, რატომ მიგყავართ გურჯაანში, თელავში გადამიყვანეთ-მეთქი , არაო. გზაში მოვახერხე ადვოკატთან დარეკვა.
ამის შემდეგ გურჯაანიდან დამაბრუნეს ისევ თელავში. მანქანაში თავისუფლება მქონდა აღკვეთილი სამი საათის განმავლობაში. მანქანიდან არ გადმოვუყვანივარ“, - განაცხადა მალხაზ მაჩალიკაშვილმა.
მისი თქმით, პანკისელებს მისი დაკავების ფაქტი რომ გაეგოთ, ამას ხეობაში „ძალიან, ძალიან დიდი ამბავი“ მოჰყვებოდა და შესაძლოა ხალხის შეჩერება მერე მას თავადაც გასჭირვებოდა.
21 აპრილს, პანკისის ხეობაში დაძაბული მოვლენების ფონზე მალხაზ მაჩალიკაშვილის დაკავების შესახებ ინფორმაცია მისმა ოჯახმა გაავრცელა. თუმცა მოგვიანებით, ეს ფაქტი უარყო თავად მალხაზ მაჩალიკაშვილმაც.