დეკანოზი ანდრია ჯაღმაიძე: პასუხისმგებლობა ეკისრება იმ ჯგუფს ვინც ეს ქმედებები წაახალისა

მთავრობის კანცელარიასთან საპატრიარქოს პრესცენტრის ხელმძღვანელი, დეკანოზი ანდრია ჯაღმაიძე იმყოფებოდა. მისი განცხადებით, ის ადგილზე ვითარებაში გარკვევის მიზნით მივიდა.


„საპატრიარქომ გააკეთა განცხადება. მეტი არაფრის თქმას არ ვაპირებ. მე ვფიქრობ, რომ მთელი პასუხიმგებლობა უნდა აიღოს იმ ორგანიზაციამ, ვინც წაახალისა ასეთი ქმედებები, რადგან ჩვენ ვხედავთ საზოგადოებაში დაძაბულობას. საპატრიარქოს განცხადება იყო პრევენციული, მოწოდება იმისაკენ, რომ არ მოხდეს სამოქალაქო დაპირისპირება და მიუხედავად ამისა, როდესაც წინასწარ იციან საზოგადოების განწყობა, მაინც ხდება ასეთი ქმედებების. მთელი პასუხიმგებლობა უნდა აიღონ მათ, ვინც ამის ორგანიზატორია“, - განაცხადა დეკანოზმა ანდრია ჯაღმაიძემ.


მან კანცელარიის მიმდებარე ტერიტორია უკვე დატოვა.


კანცელარიასთან ამ წუთებში ორი აქცია მიმდინარეობს „თბილისი პრაიდის“ ორგანიზატორთა და მათი მოწინააღმდეგე ნაციონალისტური ჯგუფების მიერ ორგანიზებული. ადგილზე ვითარებას რამდენიმე ასული პოლიციელი აკონტროლებს და დაპირისპირებულ ჯგუფებს შორის კორდონი აქვს აღმართული.


დღეს, კანცელარიასთან მიმდინარე აქციის დროს, პოლიციამ 8 პირი 

დააკავა. ყველა მათგანი კონტრაქციის წარმომადგენელია. დაკავებულები პოლიციის განყოფილებაში იმყოფებიან.


აქცია „თბილისი  პრაიდის“ ორგანიზატორებმა მას შემდეგ დაგეგმეს, რაც 14 ივნისს გავრცელდა საპატრიარქოს განცხადება, სადაც საპატრიარქოს წარმომადგენლები მოუწოდებენ ხელისუფლებას არ დაუშვან თბილისში პრაიდის ჩატარება.


„თბილისი პრაიდის“ მონაწილეები მიმართავენ ხელისუფლების პირველ პირებს გააკეთონ განცხადებები „თბილისი პრაიდის“ გარშემო განვითარებულ მოვლენებზე:


„მივმართავთ ლგბტქ ადამიანებს და მხარდამჭერებს, სამოქალაქო საზოგადოებას, საჯარო ფიგურებს, პოლიტიკოსებს, ყველას, ვისთვისაც ღირსება, თავისუფლება, თანასწორობა და სოლიდარობა მნიშვნელოვანია, მოხვიდეთ დღეს და დადგეთ ჩვენს გვერდით მთავრობის კანცელარიის წინ.


31 მაისს შინაგან საქმეთა სამინისტრომ განაცხადა, რომ სახელმწიფო ვერ დაიცავს თბილისი პრაიდის ფარგლებში დაგეგმილ ღირსების მარშს. დღეს, 14 ივნისს საქართველოს საპატრიარქომ გააკეთა სიძულვილის შემცველი და ძალადობის წამახალისებელი განცხადება, რომლითაც მოუწოდებს ხელისუფლებას არ დაუშვას მშვიდობიანი და ადამიანის უფლებების დაცვისკენ მიმართული მსვლელობა.


"თბილისი პრაიდის" ორგანიზატორები და აქტივისტები, დავრჩებით მთავრობის კანცელარიის წინ იქამდე ვიდრე აღმასრულებელი და საკანონმდებლო ხელისუფლების წარმომადგენლები მამუკა ბახტაძე, გიორგი გახარია და ირაკლი კობახიძე არ გამოვლენ და საჯაროდ არ გააკეთებენ განცხადებებს თბილისი პრაიდის გარშემო მიმდინარე მოვლენების შესახებ.


დროა და გადამწყვეტია დაფიქსირდეს სად დგას დღეს ჩვენი სახელმწიფო და რა ღირებულებებს ემსახურება“, - ნათქვამია „თბილისი პრაიდის“ ორგანიზატორების მიერ გავრცელებულ განცხადებაში.