ნიკა მელიას დაპატიმრების მოთხოვნის გამო პარლამენტის ბიუროს სხდომა კამათის ფონზე მიმდინარეობს

პარლამენტის ბიურო სხდომაზე მსჯელობენ პროკურატურის მოთხოვნაზე, მიიღოს პარლამენტისგან თანხმობა „ნაციონალური მოძრაობის“ დეპუტატის, ნიკა მელიას დასაპატიმრებლად.


საპროცედურო საკითხთა კომიტეტის თავმჯდომარის გიორგი კახიანის განცხადებით, სავარაუდოდ ბიუროს სხდომაზე გადაწყდება, რომ იურიდიულ საკითხთა და საპროცედურა საკითხთა კომიტეტებს დაევალოს განიხილოს და მიიღოს გადაწყვეტილება ნიკა მელიასთვის სადეპუტატო იმუნიტეტის შეჩერების თაობაზე. კომიტეტში განხილვის შემდეგ საკითხი პარლამენტის პლენარულ სხდომაზე დადგება.


პარლამენტში ვარაუდობენ, რომ განხილვა ნიკა მელიასთვის იმუნიტეტის შეჩერების თაობაზე ხვალვე დაიწყება.


ნიკა მელია ხვალაა დაბარებული საქართველოს გენერალურ პროკურატურაში მისთვის ბრალდების წარდგენის მიზნით. ამის შესახებ გენერალურ პროკურატურაში გამართულ ბრიფინგზე განაცხადეს. 


პროკურატურის თანახმად „საქართველოს გენერალური პროკურატურა და შინაგან საქმეთა სამინისტროს ცენტრალური კრიმინალური პოლიციის დეპარტამენტი აწარმოებს გამოძიებას 2019 წლის 20-21 ივნისს პარლამენტის წინ გამართულ აქციაზე ჯგუფური ძალადობის ორგანიზების, ხელმძღვანელობისა და მასში მონაწილეობის ფაქტზე, საქართველოს სისხლის სამართლის კოდექსის 225-ე მუხლით. 


ბრალის დამტკიცების შემთხვევაში ნიკა მელიას 6-დან - 9 წლამდე პატიმრობა ემუქრება.