გრძელდება მოლაპარაკება ბულგარეთში საქართველოს მოქალაქეთა ლეგალურად დასაქმების მიზნით

საქართველოს და ბულგარეთის წარმომადგენლები შეთანხმდნენ ორ ქვეყანას შორის შრომითი მიგრაციის რეგულირების სფეროში თანამშრომლობის ხელშეკრულების ტექსტზე. მოლაპარაკების ოფიციალური რაუნდი საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროში გაიმართა.


საქართველოს დელეგაციას ხელმძღვანელობდა მინისტრის მოადგილე თეა ახვლედიანი, ხოლო ბულგარეთის დელეგაციას შრომისა და სოციალური პოლიტიკის მინისტრის მოადგილე ლაზარ ლაზაროვი.


ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ინფორმაციით, უახლოეს მომავალში დაგეგმილია ხელშეკრულების ხელმოწერა და ძალაში შესვლა. შემდეგ ეტაპზე მუშაობა გაგრძელდება ბულგარეთსა და საქართველოს შორის დროებითი ლეგალური დასაქმების კონკრეტული სქემის ასამოქმედებლად საჭირო დოკუმენტის მომზადებაზე. ამ საკითხზე მხარეები უნდა შეთანხმდნენ ხელშეკრულების ძალაში შესვლიდან 6 თვეში.


სამინისტროს განმარტებით, ეს პროცესი საქართველოს კვალიფიციურ მოქალაქეებს მისცემს ბულგარეთში შესაბამისი მოთხოვნადი პროფესიების მიხედვით დროებით, ლეგალურად დასაქმების შესაძლებლობას.