ავთანდილ წერეთლის ბრალდების დადგენილებას მისი ადვოკატი ჩაიბარებს

"ბიზნესმენი ავთანდილ წერეთელი პროკურატურის მიერ მისთვის წაყენებულ ბრალს დაუსაბუთებელს უწოდებს და აცხადებს, რომ არანაირ დანაშაულებრივ ქმედებაში მონაწილეობა არ მიუღია", - ამის შესახებ იტყობინება სააგენტო „ინტერპრესნიუსი“  ბიზნესმენის ადვოკატზე დაყრდნობით.


ადვოკატის ინფორმაციით, ავთანდილ წერეთელი საქართველოში არ იმყოფება, თუმცა, დაბრუნების შემდეგ, საგამოძიებო უწყებაში მისვლას გეგმავს.


ბიზნესმენის ადვოკატი 22 აგვისტოს, 18:00 საათზე, პროკურატურაში თავად ჩაიბარებს მისი დაცვის ქვეშ მყოფის ბრალდების დადგენილებას.


22 აგვისტოს გენერალურმა პროკურატურამ ბიზნესმენ ავთანდილ წერეთელს, "თიბისი ბანკის" დამფუძნებლების მამუკა ხაზარაძისა და ბადრი ჯაფარიძის წინააღმდეგ აღძრული სისხლის სამართლის საქმის ფარგლებში, ბრალი წარუდგინა.


გამოძიება ავთანდილ წერეთელს ედავება „თიბისი ბანკის“ ხელმძღვანელების, მამუკა ხაზარაძისა და ბადრი ჯაფარიძისთვის „16 664 000 ამერიკული დოლარის უკანონო შემოსავლის ლეგალიზაციაში დახმარებას და დიდი ოდენობით შემოსავლის მიღებას“.