სალომე ზურაბიშვილი: პრეზიდენტი არ უნდა რეაგირებდეს მუდმივად სხვის მიერ დაგეგმილ პროვოკაციებზე
სალომე ზურაბიშვილი თავის სიტყვაში ხაზს უსვამს კონსტიტუციის მნიშვნელობას და აღნიშნავს, რომ 1921 წელს მიღებული კონსტიტუცია იქცა 1991 წელს მოპოვებული დამოუკიდებლობის სამართლებრივ საფუძვლად:
"დამოუკიდებლობა თუ ვერ დაიცვა პირველი რესპუბლიკის კონსტიტუციამ, მან მისცა მთავარი იარაღი ემიგრაციას და თვით ქვეყანაში, აქ მებრძოლ თაობებს, რათა სახელმწიფოს აღდგენის საფუძველი შეენარჩუნებინათ.... ამაყი ვარ და დიდ პასუხისმგებლობას ვგრძნობ, რომ პრეზიდენტის უმაღლესი ვალდებულება სწორედ კონსტიტუციის დაცვა და მისი პრინციპების ერთგულება არის, სწორედ როგორც თვით კონსტიტუცია ამბობს, პრეზიდენტია ქვეყნის ერთიანობისა და ეროვნული დამოუკიდებლობის გარანტი..."
პრეზიდენტი თავის სიტყვაში ასევე ეხება პრეზიდენტისთვის კონსტიტუციით მინიჭებულ უფლებებსა და ვალდებულებებებს, რომლებიც, მის თანახმად, ხშირად ან არასწორად გაგებულია ან განზრახ დამახინჯებული, საზოგადოების შეცდომაში შეყვანის მიზნით:
"დიახ, პრეზიდენტის მოვალეობაა საზღვარი დაიცვას, საზღვარზე მივიდეს და ადგილზე გაეცნოს სიტუაციას და რაც მთავარია, ყველაფერი იღონოს რომ ყველა ჩვენს მეზობელთან საზღვრები დადგინდეს. ამდენად მოლაპარაკებების განახლება და ამ პროცესის დაჩქარება და მხარდაჭერა ზუსტად ჯდება პრეზიდენტის მოვალეობაში. რაც შეეხება საოკუპაციო ხაზს, პრეზიდენტი უნდა ზრუნავდეს იქ მცხოვრებ ჩვენს მოქალაქეებზე. მთავრობასთან ერთად ზრუნავდეს მათი პირობების გაუმჯობესებაზე, რამეთუ ისინი ქვეყნის მთლიანობის სადარაჯოზე დგანან. მაგრამ, პრეზიდენტი არ უნდა რეაგირებდეს მუდმივად სხვის მიერ დაგეგმილ პროვოკაციებზე და სხვისი დღის წესრიგის მიხედვით არ უნდა მოქმედებდეს. ჩვენი მთავარი მიღწევა სწორედ ის არის, რომ ოკუპაციამ ვერ გადაგვიყვანა არჩეულ გზიდან და ვერ შეარყია ჩვენი მთავარი მონაპოვარი - დემოკრატია და სტაბილურობა..."
სალომე ზურაბიშვილი თავის სიტყვაში ლაპარაკობს 20-21 ივნისის ღამით განვითარებულ მოვლენებზეც:
"მე პირადად, და ვიცი, რომ თქვენც, არავისზე ნაკლებად არ მტკივა და არ გვტკივა, იმ ახალგაზრდებზე, ვინც თვალი დაკარგა და მათ შორის ერთმა პოლიციელმა 20 ივნისის მოვლენების დროს. ეს ჩვენი ყველასი ტკივილია და ყველანი ერთად ვიზიარებთ ამ ტრაგედიას. თუმცა პრეზიდენტი, ვერანაირად ვერ გაამართლებს, ვინც პოლიციაზე ძალადობდა, პარლამენტზე შტურმით ქვეყნის ინსტიტუტებს აყენებდა საფრთხის ქვეშ. კონსტიტუციის გარანტორობა ამას ნიშნავს. პროტესტი არათუ მისაღებია, არამედ განუყოფელი ნაწილია დემოკრატიის. თუმცა სახელმწიფოს და მისი ინსტიტუტების შეტევა არის უმძიმესი დანაშაული, მით უმეტეს ქვეყანაში, რომელსაც ოკუპირებული ტერიტორიები გააჩნია..."
პრეზიდენტის განცხადებით, საქართველოს კონსტიტუციის საფუძველზე გვეძლევა საშუალება, ავაშენოთ სახელმწიფო სადაც უფლება, თავისუფლება და პასუხისმგებლობა იქნება თანაბრად მნიშვნელოვანი პრინციპები თითოეული მოქალაქისთვის.
პრეზიდენტის სასახლეში კონსტიტუციის დღესთან დაკავშირებით გამართული ღონისძიების სტუმრებს ასევე სიტყვით მიმართა საქართველოს პრემიერ-მინისტრმა მამუკა ბახტაძემ.
1995 წლის 24 აგვისტოს, საქართველოს პარლამენტმა მიიღო სახელმწიფოს უზენაესი კანონი - კონსტიტუცია. სახელმწიფო საკონსტიტუციო კომისია თავდაპირველად 1921 წლის კონსტიტუციის ახალ რედაქციაზე მუშაობდა, მაგრამ, საბოლოოდ, ახალი კონსტიტუციის მიღება გადაწყდა.
კონსტიტუციის დღესთან დაკავშირებით საქართველოს პრეზიდენტის სასახლეში ყოველწლიურად იმართება საზეიმო მიღება, სადაც იფინება ეროვნულ არქივში დაცული დოკუმენტები: 1921 და 1995 წლების კონსტიტუციის დედნები, აგრეთვე, თემასთან დაკავშირებული ისტორიული ფოტომასალა. შეკრებილ საზოგადოებას სიტყვით მიმართავენ საქართველოს პრეზიდენტი და მთავრობის წევრები.