აქციის მონაწილეებმა ბოქლომი სიმბოლურად ადმინისტრაციის ღობეს დაადეს
სამოქალაქო აქტივისტები და ოპოზიციური პარტიების წარმომადგენლები, მათ შორის „ევროპული საქართველოდან,“ „ნაციონალური მოძრაობიდან“ და "ახალი საქართველოდან" მხარდამჭერებთან ერთად ცდილობდნენ ჭიშკართან მიახლოებას და ბოქლომების დადებას, რაც მათ პოლიციის წინააღმდეგობის გამო ვერ შეძლეს.
ამ დროისათვის აქცია უკვე დასრულებულია.
სამოქალაქო აქტივისტები და ოპოზიციური პარტიები 14 ნოემბრიდან მართავენ საპროტესტო აქციებს მთავრობის გადადგომის, ცესკოს შემადგენლობის შეცვლის და ვადამდელი პროპორციული არჩევნების ჩატარების მოთხოვნებით.
საპროტესტო გამოსვლები მას შემდეგ დაიწყო, რაც "ქართულმა ოცნებამ" არ შეასრულა 2020 წლის არჩევნების პროპორციული სისტემით ჩატარების დაპირება. პროპორციული არჩევნები ივნისის ანტისაოკუპაციო აქციების მონაწილეთა ერთ-ერთი მოთხოვნა იყო.
14 ნოემბერს, პარლამენტის სხდომაზე შესაბამის საკონსტიტუციო ცვლილებას მხარი დაუჭირა 101-მა დეპუტატმა, მაშინ, როცა საჭირო იყო სულ მცირე 113 დეპუტატის ხმა. "ქართული ოცნების" მიერ ინიცირებულ კანონპროექტს ხმები დააკლდა თავად "ქართული ოცნების" უმრავლესობიდან.