პრეზიდენტი: უნდა გამოვყოთ ადგილი, სადაც ყველა ომსა და ბრძოლაში დაღუპულები იქნებიან ერთად
საქართველოს პრეზიდენტის განცხადებით, საქართველოს დღევანდელი დამოუკიდებლობა იუნკერთა გამარჯვებაა და დღემდე გრძელდება მათი ბრძოლა.
„დრო მოვიდა, რომ ერთი ადგილი გამოვყოთ ამ ქალაქში, სადაც იქნება ერთი მემორიალი ყველასთვის. არა ეს დაფა, რომელიც პარლამენტის შენობაზეა და არა ეს ადგილი, (პარლამენტის შიდა ეზო), რომელიც ფართო საზოგადოებისათვის მიუწვდომელია, არამედ, სხვა ადგილი, სადაც ცხრა აპრილს და ჩვენს ყველა ომსა და ბრძოლაში დაღუპულები იქნებიან ერთად.
ეს საერთო მემორიალი იქნება შემეცნებითი ადგილიც, სადაც ახალგაზრდებს შეეძლებათ სკოლებიდან მისვლა, რათა პატივი მიაგონ მათ ხსოვნას, გაიგონ რა ხდებოდა, რამდენი ბრძოლა ჩაატარა ამ ქვეყანამ, რამდენი ადამიანი დაიღუპა, რამდენმა დალია სული და რა არის ჩვენი მემკვიდრეობა, რომელსაც ყველამ პატივი უნდა ვცეთ“, - აღნიშნა საქართველოს პრეზიდენტმა პარლამენტის ეზოში, იუნკერთა მემორიალთან სიტყვით გამოსვლისას.
1921 წლის თებერვალში იუნკრებმა - თბილისის სამხედრო სასწავლებლის კურსანტებმა, თავი შესწირეს საქართველოს დამოუკიდებლობის დაცვას. ძირითადი ბრძოლები გაიმართა თბილისის მისადგომებთან (კერძოდ, ტაბახმელა-კოჯორში), სადაც სამხედრო სასწავლებლის კურსანტებმა წითელ არმიას მედგარი წინააღმდეგობა გაუწიეს.
1921 წლის 25 თებერვალს საბჭოთა არმიამ მაინც შეძლო დაეპყრო საქართველოს ახალგაზრდა დემოკრატიული რესპუბლიკა.
გმირულად დაღუპული იუნკრები პატივით დაკრძალეს თბილისში, ეკლესიის ეზოში - იქ, სადაც ახლა საქართველოს პარლამენტის შენობა მდებარეობს. კოჯორში, სადაც ისტორიული ბრძოლა გაიმართა, მემორიალი გაიხსნა, ხოლო ყოველი წლის 23 თებერვალი საქართველოში იუნკერთა ხსენების დღედ გამოცხადდა.