საერთაშორისო პრესა კორონავირუსზე: „მარტო სახლში“ და ევროკავშირის კრიზისის პერსპექტივა
„ჩვენი მიზნები ქრება“, - წერს შვეიცარიელი ფილოსოფოსი, ბარბარა ბლეიში, შვეიცარიაში გამომავალ მემარცხენე-ცენტრისტულ ყოველდღიურ გამოცემა Tages-Anzeiger-ში 16 მარტს და დასძენს, კორონავირუსის კრიზისში ადამიანებისთვის ყველაზე დიდი შოკი იმის გაცნობიერება იქნება, რომ მათი ყოველდღიური გეგმები და გასაკეთებელი საქმეების სიები აზრს დაკარგავსო. „ჩვენი არსებობა სავსეა ისეთი ქმედებებით, რომლებსაც კირან სეტია, მასაჩუსეტსის ტექნოლოგიური ინსტიტუტის (MIT) ფილოსოფიის პროფესორი, ‘ტელიშს’ უწოდებს, ბერძნული ‘ტელოსიდან’ გამომდინარე - ქმედებებით, რომლებიც მიზანზეა ორიენტირებული და, ამდენად, აქვთ საბოლოო წერტილი, როცა ისინი სრულდება და მთავრდება. ... კორონა ამ ჩვევას აუცილებლად მოგვიშლის, რადგან ჩვენი მიზნებიდან ბევრი გადაიდება ან, საერთოდ, გაუქმდება. ახალი მიზნების დასახვა რთულია. ვინ იცის, რას მოგვიტანს მომავალი კვირა ან თვე? მოგვიწევს, თავიდან აღმოვაჩინოთ მიზნებზე უფრო ნაკლებად მიმართული ქმედებების ღირებულება“.
ბრიტანეთში გამომავალი კონსერვატიული ორიენტაციის The Times-ი 16 მარტს გამოდის გაფრთხილებით, რომ კორონას შესახებ ახალი ამბების მუდმივი გაცნობა წყურვილის მარილიანი წყლით მოკვლას ჰგავს და ის ხალხი, რომელიც ახალ ამბებს უწყვეტად ადევნებს თვალს, შესაძლოა მართლაც ავად გახდეს. „ჩვენ დავეწაფებით ახალ ამბებს იმედით, რომ ისინი პასუხებს მოგვიტანს და ეს პასუხები დამაიმედებელი იქნება. ვფიქრობთ, რომ ინფორმაციით თუ შევიარაღდებით, ეს ვითარებაზე კონტროლის განცდას დაგვიბრუნებს. ინფორმაცია ძალააო, ხომ ამას გვეუბნებოდნენ ყოველთვის. მაგრამ ახალი ამბების მუდმივი მიღება ჩვენს შეშფოთებას არ აქარწყლებს. შფოთისგან გათავისუფლების მიზნით ახალი ამბების უწყვეტად გაცნობა მარილიანი წყლით წყურვილთან ბრძოლას ჰგავს - თავიდან ეს შვებას გგვრით, მაგრამ, საბოლოო ანგარიშით, კონტრპროდუქტიულია. ... ბევრი თვითიზოლაციას ირჩევს სხვა ადამიანებისგან, ფიზიკური ჯანმრთელობის შესანარჩუნებლად, ხოლო ფსიქოლოგიური ჯანმრთელობისთვის ბევრს ნამდვილად წაგვადგებოდა ინფორმაციის 24-საათიანი ციკლისგან თვითიზოლაცია“.
„იკითხეთ წიგნები, მაგრამ ისინი Amazon-ზე არ შეუკვეთოთ“, - გვირჩევს ბლოგერი ფრანსუა გეზე საფრანგეთში დაფუძნებულ მემარცხენე ორიენტაციის ონლაინგამოცემა Mediapart-ზე 16 მარტს გამოქვეყნებულ წერილში. „წიგნის მაღაზიების გარეშე, რომლებიც ხელს უწყობენ გამომცემლობებს და უმნიშვნელოვანეს როლს ასრულებენ ახალი იდეებისა და ლიტერატურული სიახლეების პოპულარიზაციაში, წიგნები ვერც ყურადღებას მიიზიდავს და ვერც მკითხველს. ამჟამინდელ კრიზისში წიგნები, რომლებიც გაინტერესებთ, ონლაინ უნდა იყიდოთ. მე გთხოვთ, ისინი შეიძინოთ არა Amazon-იდან, არამედ წიგნების დამოუკიდებელი მაღაზიების ონლაინგანყოფილებებიდან ... ეს იქნება მხარდაჭერის მნიშვნელოვანი ჟესტი წიგნების იმ მაღაზიებისთვის, რომელთა არსებობას დიდი საფრთხე დაემუქრა ამჟამინდელი კრიზისით“.
„ვირუსის მძევალი“ - ასე აფასებს ევროკავშირის მდგომარეობას იტალიაში გამომავალი მემარცხენე-ცენტრისტული La Repubblica. „ევროკავშირის ‘წითელ ზონად’ გადაკეთება, რათა თავი დაიცვას გლობალური ინფიცირებისგან, არის ის, რის ნახვას ან გამოცდას ვერასოდეს წარმოვიდგენდით. ... მაგრამ სახელმწიფოებისა და მთავრობების ხელმძღვანელებმა სწორედ ეს გადაწყვეტილება მიიღეს, ალბათ, ყველაზე დრამატულ დისტანციურ შეხვედრაზე, რომლის მომსწრეც ევროკავშირი გამხდარა. განმანათლებლობის ეთოსის ევროპა ... სამართლიანი, თავისუფალი და სავსე სოლიდარობის სულისკვეთებით, მარცხდება მტერთან, რომელიც უხილავია და ხელიდან გვისხლტება. ევროპა, როგორც იდეების, ადამიანებისა და საგნების თავისუფალი გაცვლა-გამოცვლის სივრცე, იძულებულია შეიარაღდეს დაავადების წინააღმდეგ, რომელიც სუნთქვას გვართმევს და მძევლად ავყავართ“.
„ეგოიზმი მეფობს“, - ასკვნის ავტორი, პიტერ იანჩუ, გერმანიის მაუწყებლის, Deutsche Welle-ს, რუმინულენოვან ვებსაიტზე 16 მარტს გამოქვეყნებულ წერილში. „იტალიელები, სადაც სიკვდილიანობის მაჩვენებელი სხვა ადგილებზე უფრო მაღალია, ტყუილად ელოდნენ დახმარებას და სოლიდარობას ევროკავშირის სახელმწიფოებისა და მაღალგანვითარებული ჩრდილოეთ ევროპის ქვეყნებისგან. ... სიცხესა და მშრალ ხველასთან ერთად ამ პანდემიას აქვს სხვა სიმპტომებიც, რომლებსაც დიდად არ აანალიზებენ ხოლმე. ... ერთი მათგანია პანიკის და მზარდად სასტიკი ეროვნული ეგოიზმის ეპიდემია, რომელიც ჯიუტად არ ხედავს რეალობას: მკვლელი ძალიან პატარაა საიმისოდ, რომ პასპორტი სჭირდებოდეს და ძალიან ძლიერია საიმისოდ, რომ მის ამოძირკვას ერთი ქვეყნის მიერ გატარებული ზომები ეყოს“.
ჩეხეთში გამომავალი ლიბერალური ორიენტაციის Hospodářské noviny კი 17 მარტის ნომერში ასკვნის, რომ ევროკავშირის ხარვეზები ცალკეული წევრი ქვეყნების ბრალია. „ყველას, ვინც ევროკავშირს ამჟამინდელ კრიზისში უმოქმედობაში ადანაშაულებს, უნდა შევახსენოთ, რომ ბლოკს მხოლოდ იმდენი უფლებამოსილება აქვს, რამდენსაც მას წევრი ქვეყნები ანიჭებენ. აზრი არ აქვს ევროკავშირის დადანაშაულებას სამედიცინო ნიღბების დეფიციტში, მაგალითად. ... აქ კიდევ ერთი საფრთხე ჩნდება: როცა ეს კრიზისი დამთავრდება, ბევრი იტყვის, რომ ევროკავშირი, მისი ამჟამინდელი ფორმით, საჭირო არ არის. და ეს კიდევ ერთი შეცდომა იქნება. ... ნებისმიერ შემთხვევაში, კორონავირუსის შემდეგ ვითარება უხერხული იქნება პოლიტიკოსებისთვის, რომლებიც შეეცდებიან ევროპული თანამშრომლობის ეთოსის დაცვას“.