რუსეთი კვლავ მოითხოვს „ლუგარის ცენტრის“ ინსპექტირებას და მიანიშნებს ბიოლოგიურ საფრთხეზე
„მაღალი ბიოთავდაცვის მქონე აღნიშნული ლაბორატორია აშშ-ის თავდაცვის სამინისტროს მიერ არის აშენებული და, მის ინტერესებიდან გამომდინარე,გამოიყენება განსაკუთრებით საშიში ინფექციური დაავადებების გამომწვევი მიკრობების შესასწავლად“, - ნათქვამია რუსეთის საგარეო საქმეთა სამინისტროს საინფორმაციო დეპარტამენტის მიერ ოფიციალურ საიტზე გამოქვეყნებულ ცნობაში.
რუსეთის საგარეო უწყება აპელირებსბიოლოგიური და ტოქსიკური იარაღის აკრძალვის საერთაშორისო კონვენციას(BTWC) და აღნიშნავს, რომ არაერთი მოთხოვნის მიუხედავად აშშ-ი არ აწვდის რუსეთს ინფორმაციას ლუგარის ცენტრში მიმდინარე ორმაგი დანიშნულების საქმიანობის შესახებ.
„ლუგარის სახელობის ცენტრის საქმიანობა იწვევს სერიოზულ შეკითხვებს აშშ-ის მხრიდან BTWC-ით ნაკისრი ვალდებულებების შესრულებასთან დაკავშირებით. კერძოდ, აღინიშნა, რომ ამ ბიოობიექტის ბაზაზე ტარდება კვლევები განსაკუთრებით საშიში ბიოლოგიური აგენტებისა და ინფექციების გამომწვევი მიკრობების მწერების საშუალებით გადატანის მიმართულებით. აღნიშვნის ღირსია, რომ აშშ-მა უკვე დააპატენტა უპილოტო მფრინავი აპარატი დაინფიცირებული კოღოების ჰაერში გასავრცელებლად. ამას გარდა, გაიცა პატენტი საბრძოლო მასალების წარმოებაზე, რომლებიც მომწამვლელი ნივთიერებით ან ინფექციური აგენტებით იქნება დამუხტულია“, - ნათქვამია რუსეთის საგარეო საქმეთა სამინისტროს საიტზე გავრცელებულ განცხადებაში.
რუსეთის საგარეო უწყება ეჭვქვეშ აყენებს საერთაშორისო ექსპერტთა ჯგუფის მიერ 2018 წლის 14-15 ნოემბერში ჩატარებული შემოწმების სანდოობას და მიზანშეწონილად მიიჩნევს, ლუგარის ცენტრის „ნამდვილ შემოწმებას“ რუსი ექსპერტების მიერ, რომლებსაც უნდა ჰქონდეთ „გარანტია შევიდნენ ყველა კორპუსში, მათ შორის შენობაში, რომელსაც ამერიკელი სპეციალისტები იკავებენ“.
უფრო ადრე სენატორ რიჩარდ ლუგარის სახელობის საზოგადოებრივი ჯანდაცვის კვლევითი ცენტრის შესახებ რუსული სახელმწიფო მოხელეებისა და რუსული მედიის ნაწილის მიერ გავცრელებულ დეზინფორმაციას გამოეხმაურა საქართველოში ამერიკის შეერთებული შტატების ელჩი კელი დეგნანი, რომელმაც შემაშფოთებული უწოდა პანდემიის კონტროლის პროცესში საქართველოსა და ლუგარის ლაბორატორიის წინააღმდეგ მიმართულ დეზინფორმაციას.
საქართველოში აცხადებენ, რომ რუსულ დეზინფორმაციას მიზანში აქვს ამოღებული ის წარმატებული პროგრამები, რომლებსაც ლაბორატორია ახორციელებს. მათ შორის არის C ჰეპატიტის ელიმინაციის პროგრამა. ლუგარის ლაბორატორია ამ პროგრამის გარე კონტროლს ახორციელებს. შედეგად 2015 წლიდან 4 3011 პაციენტი სრულიად განიკურნა.