ვოლოდინი: "უცხოეთის აგენტები" საკუთარ ანგარიშზე წვდომას შეძლებენ "აგენტის" სტატუსის გაუქმების შემდეგ

როგორც რუსეთის სახელმწიფო დუმის სპიკერის, ვიაჩესლავ ვოლოდინის კომენტარიდან ჩანს, კანონპროექტს, რომელიც „უცხოეთის აგენტებს“ რუსეთში ფაქტობრივად უწყვეტს წვდომას საავტორო ჩარიცხვებზე, გამკაცრებული სახით შეიტანენ დუმაში.


ამ კანონპროექტის წარდგენა გასულ კვირაში დააანონსა ვოლოდინმა. დოკუმენტის თანახმად, „უცხოეთის აგენტების“ შემოქმედებითი საქმიანობიდან მიღებული ნებისმიერი შემოსავალი უნდა ჩაირიცხოს რუბლების სპეციალურ ანგარიშზე, რომლის გახსნა სავალდებულო იქნება.




„სპეციალურ ანგარიშზე არსებული ფულადი სახსრების განკარგვას უცხოეთის აგენტები შეძლებენ მხოლოდ უცხოეთის აგენტის სტატუსის გაუქმების შემდეგ,“ განაცხადა ვოლოდინმა.


„სასამართლოს გადაწყვეტილებით, შესაძლებელი იქნება სახსრების ჩარიცხვა ბიუჯეტში,“ დასძინა მან და, ფაქტობრივად, გამოაცხადა იმ „უცხოეთის აგენტების“ სახსრების ექსპროპრიაცია, რომლებიც შემოქმედებით საქმიანობას ეწევიან.


ამ დროისთვის „უცხოეთის აგენტად“ აღიარებულია 491 ადამიანი, თქვა ვოლოდინმა.


„მათი უმრავლესობა უცხოეთში ცხოვრობს, მაგრამ საავტორო ანაზღაურებას რუსეთიდან იღებს. კვლავაც აძლევენ თავს უფლებას, შეურაცხყოფა მიაყენონ ჩვენს ქვეყანას, მის მოქალაქეებს. არ ერიდებათ იმის მოყოლა, რომ მიღებულ თანხებს ხარჯავენ, სხვათა შორის, უკრაინის შეიარაღებული ძალების მხარდაჭერისთვის. ეს დაუშვებელია,“ დაწერა ვოლოდინმა ტელეგრამში.