გარდაიცვალა ქალი, რომელზეც ყოფილმა ქმარმა იძალადა
გარდაცვლილის მეზობელმა, თაკო ყორღანაშვილმა რადიო თავისუფლებას უთხრა, რომ ქალზე ყოფილმა ქმარმა ფიზიკურად იძალადა. მისი თქმით, კაცი საპატიმროდან დაახლოებით ერთი თვის წინ გამოვიდა.
"როგორც ვიცი სასჯელს იხდიდა ცოლზე ძალადობის ბრალდებით... 11 ნოემბერს, ღამით სახლში მიუვარდა და სცემა. თავში ქვა ჩაარტყა. ამ დროს სახლში იმყოფებოდნენ ქალის მამა, ბებია და ორი შვილი. ერთი 18 წლისაა, მეორე 7-ის. ამ დროს ქალთან იყო მისივე დაქალი. ყვირილის ხმაზე მან გამოიძახა სასწრაფო სამედიცინო დახმარება. ქალი კლინიკაში გადაიყვანეს. როგორც ვიცი, მოძალადე იმავე დღეს პოლიციას ჩაბარდა“ - უთხრა რადიო თავისუფლებას თაკო ყორღანაშვილმა.
შინაგან საქმეთა სამინისტრომ მომხდარზე გამოძიება დაიწყო საქართველოს სისხლის სამართლის კოდექსის ორი მუხლით - 11 პრიმა 109-ე (განზრახ მკვლელობა დამამძიმებელ გარემოებებში) და 11 პრიმა 381 მუხლით (განაჩენის ან სხვა სასამართლო გადაწყვეტილების შეუსრულებლობა). კაცს შემაკავებელი ორდერი ჰქონდა გამოწერილი.
რადიო თავისუფლება ცდილობს გაარკვიოს, როდის დააკავეს კაცი პირველად, რის გამო იხდიდა სასჯელს, როდის და როგორ დატოვა საპატიმრო. ინფორმაცია მასალაში აისახე მისი მიღების შემთხვევაში.
ქალთა მიმართ ძალადობა გენდერული ნიშნით - ეს არის ქალის წინააღმდეგ მიმართულ ძალადობა იმის გამო, რომ ის ქალია.
2024 წლის პირველ რვა თვეში, საქართველოში რვა ქალი მოკლეს. 2024 წლის პირველ ექვს თვეში, შინაგან საქმეთა სამინისტრომ ოჯახში ძალადობის ფაქტებზე 4500-მდე შემაკავებელი ორდერი გამოსცა. ამავე პერიოდში, შინაგან საქმეთა სამინისტროს მიერ გამოქვეყნებული სტატისტიკის თანახმად, საქართველოში ოჯახში ძალადობის 5472 შემთხვევა აღირიცხა, მათ შორის ფიზიკური ძალადობის 1243 და ფსიქოლოგიური ძალადობის 4081 შემთხვევა.
*თუ ხართ ოჯახში ძალადობის მსხვერპლი ან ფლობთ ინფორმაციას ოჯახში ძალადობის შესახებ, დარეკეთ ნომერზე 112 ან 116 006.