«Мин татарча сөйләшәм!» акциясендә чыгыш ясарга теләүчеләр өчен бәйге игълан ителде
26 апрельдә «Мин татарча сөйләшәм!» акциясе сәхнәсендә чыгыш ясарга теләүчеләр яңа җанлы музыка бәйгесендә катнаша ала.
«Үзең иҗат иткән җырны тере уен коралларына, минуска яки а-капелла башкарып, видеога төшерергә кирәк. Профессиональ камера яки телефон камерасы буламы — аерма юк. Башкаручылар саны чикләнмәгән. Җырның сүзләрен татар классик шагыйрьләре иҗатыннан алу рөхсәт ителә һәм хуплана. Язмада тулы бер җыр булырга тиеш, өзекләр кабул ителми. Клиплар, шулай ук, бәйгедә катнашмый», – дип хәбәр итте Бөтендөнья татар яшьләре форумы матбугат хезмәте.
Бәйгедә катнашу тәртибе: Видеоны интернетка йөкләргә һәм гаризаны тутырырга. «ВКонтакте»дагы сәхифәңдә пост белән бүлешергә (репост).
«Гаризалар 7 апрель 21:00 сәгатькә кадәр кабул ителә. 8 - 15 апрель «Мин татарча сөйләшәм»нең ВКонтактедагы төркемендә иң яхшы башкаручыга тавыш бирү була. Бәйгедә җиңгән ике катнашучыны 26 апрель сәхнәдә чыгыш ясарга чакырачакбыз. Беренче урынны халык сайлый, икенче урынны — оештыручылар. Җиңүчеләр үз чыгышларын безнең кураторалар — Gauga һәм qaynar төркемнәре белән бергә әзерләячәк һәм «Мин татарча сөйләшәм!» сәхнәсендә чыгыш ясаячак. Бер атна дәвамында аранжировка өстендә эшләргә, репетицияләргә йөрергә һәм тере яңгырашта чыгыш ясарага әзер булыгыз», – диде Бөтендөнья татар яшьләре форумы рәисе Райнур Хәсәнов.