Татарстан Мәгариф министрлыгы: Югары белем бирү системасы әкренләп яңартылачак
Илкүләм югары белем бирү системасы әкренләп яңартылачак. Билгеләнгән үзгәрешләр бакалавр дипломын алган яки хәзерге вакытта бакалавр программалары буенча белем ала торган кешеләр өчен бернинди зыян китерми. Бу хакта «Татар-информ» мәгълүмат агентлыгына ТР Мәгариф һәм фән министрлыгының матбугат хезмәтендә хәбәр иттеләр.
Анда Россия Федерациясе Президенты Владимир Путин кушуы буенча Россия Мәгариф министрлыгының югары белем бирүнең милли системасын камилләштерү буенча эшләвен искәрттеләр. Билгеләнгән үзгәрешләр ил югары мәктәбенең тарихи традицияләрен һәм илнең профессиональ кадрларга актуаль ихтыяҗларын исәпкә алырга тиеш.
«2023 елда старт алган пилот проекты, аерым алганда, яңа белем бирү моделенә күчүне күздә тота. Бакалавриат һәм белгечлек урынына төп белем дәрәҗәсе киләчәк. Әзерлек юнәлешенә бәйле рәвештә, анда уку вакыты 4 елдан 6 елга кадәр була. Бу белем уку йортын тәмамлаучыга эшкә уңышлы урнашу һәм белгечлеге буенча алга таба эшләү өчен җитәрлек булыр дип планлаштырыла», – дип шәрехлиләр министрлыкта.
ТР Мәгариф һәм фән министрлыгында магистратура, ординатура һәм ассистентура-стажировканы махсус югары белем алмаштырачак, анда уку вакыты 1-3 ел тәшкил итәчәк, дип өстәделәр. Шул ук вакытта аспирантурада фәнни һәм фәнни-педагогик кадрлар әзерләячәкләр.
«Пилот проекты Россиянең алты университеты базасында гамәлгә ашырыла. Шул ук вакытта әйдәп бара торган югары уку йортлары, шул исәптән Татарстанда урнашкан югары уку йортлары да, аларның нинди ведомствога каравына карамастан, яңа белем бирү моделе турында фикер алышуда актив катнашалар», – дип сөйләделәр ведомствода.