Де Зерби мағлубиятдан сўнг жамоа учун кечки овқат ташкиллаштирди
"Тоттенҳэм" бош мураббийи Роберто Де Зерби раҳбарлигидаги илк ўйин жамоа учун омадсиз якунланди. Лондонликлар "Сандерленд"га қарши баҳсда 0:1 ҳисобида мағлуб бўлишди.
Учрашувдан сўнг италиялик мутахассис жамоанинг руҳий ҳолатини тиклашга қаратилган қадам ташлади. У футболчилар учун машҳур Bacchanalia ресторанида умумий кечки овқат ташкил қилди. Бу ҳақда The Telegraph хабар берди.
Де Зерби бу қарорни тасодифий эмас, балки онгли равишда қабул қилган. Унинг фикрича, ҳозирги босқичда жамоанинг энг катта муаммоси — психология ва ўзига ишонч етишмаслиги ҳисобланади.
Маълум қилинишича, футболчилар ташриф буюрган ресторан концепцияси ҳам рамзий маънога эга. У ўзини «эскапизмга чанқоқлар» учун мўлжалланган жой сифатида тавсифлайди — яъни ҳаётдаги босим ва қийин вазиятдан вақтинча қочиш имконини берадиган муҳит.
Жамоа ҳозир Англия Премьер-лигаси жадвалида хавфли зонага яқин жойлашгани сабабли, ҳар бир майда детал ҳам муҳим аҳамият касб этмоқда. Шу боис Де Зерби футболчиларни руҳан тиклашни устувор вазифа сифатида кўрмоқда.
Ҳозирги вазиятда «Тоттенҳэм» учун фақат тактик тайёргарлик эмас, балки ички ишончни қайта тиклаш ҳам ҳал қилувчи омилга айланган.