Лапорта 2023 йилда Мессининг «Барселона»га қайтишини тақиқлаб қўйди
«Барселона» собиқ бош мураббийи Хави Эрнандес клуб раҳбарияти Лионель Мессининг жамоага қайтишига тўсқинлик қилганини маълум қилди. Мураббийнинг сўзларига кўра, 2023 йилда аргентиналик юлдузнинг трансфери бўйича барча келишувлар тайёр бўлган. Бу ҳақда Goal.com хабар беради.
Хави беш ой давомида Месси билан музокаралар олиб борганини ва футболчи «Барселона»га қайтишга розилик берганини таъкидлади. Бироқ якуний босқичда клуб президенти Жоан Лапорта ушбу трансферга рухсат бермаган.
Иқтисодий муаммолар сабабли Неймар ва Педро каби собиқ футболчиларни қайтариш режалари ҳам барбод бўлган.
Собиқ мураббий Мессининг машғулотлардаги иштиёқи ва ўзаро муносабатлари ҳақида ҳам тўхталиб ўтди. Хави Мессини 16 ёшидан бери билишини ва у билан доимо ишончга асосланган дўстлик алоқалари сақланиб қолганини билдирди.
Шунингдек, Хави ҳозирги ёш юлдуз Ламин Ямал ҳақида юқори фикр билдирди. У ўсмир футболчини «танланган даҳо» деб атади ва унинг келажаги фақат ўзининг интилиши ҳамда руҳий ҳолатига боғлиқлигини айтди.
Хави ўзининг кетишига спорт натижалари эмас, балки клуб ичидаги келишмовчиликлар сабаб бўлганига шама қилди. Шунга қарамай, у Ҳанси Флик бошчилигидаги лойиҳани қўллаб-қувватлашини ва жамоада келгуси 10 йил учун мустаҳкам пойдевор яратилганини таъкидлади.