Винисиуснинг голи «Реал Мадрид»га «Алавес» устидан ғалаба келтирди
«Реал Мадрид» бош мураббийи Алваро Арбелоа Ла Лига доирасида «Алавес» устидан қозонилган ғалабадан сўнг ҳужумчи Винисиус Жуниорни ҳимоя қилиб чиқди. Бразилиялик футболчи «Сантьяго Бернабеу» стадионидаги оғир муҳитга қарамай, жамоасига муҳим уч очкони тақдим этган гол муаллифига айланди. Бу ҳақда Goal.com хабар беради.
Чемпионлар лигасидан чиқиб кетганидан норози бўлган мухлислар ўйин бошида Винисиус ва унинг жамоадошларини ҳуштакбозлик билан кутиб олишди. Бироқ ҳужумчи иккинчи бўлимда узоқ масофадан аниқ зарба йўллаб, танқидчиларга муносиб жавоб қайтарди.
Арбелоа унинг руҳий кучи ва қийин вазиятларда масъулиятни ўз зиммасига олишини юқори баҳолади.
Учрашув давомида ярим ҳимоячи Эдуардо Камавинга ҳам мухлислар босимига дуч келди. «Бавария» билан ўйинда майдондан четлатилган франциялик футболчи захирадан майдонга тушганида мухлислар томонидан норозилик билан кутиб олинди.
Мураббий Камавинганинг ҳам маҳорати ва тажрибаси тез орада яна намоён бўлишига ишонч билдирди.
«Реал Мадрид» ушбу ғалабадан сўнг турнир жадвалида «Барселона» билан фарқни олти очкогача қисқартирди. Ўйин давомида Килиан Мбаппе ҳам ўз ҳисобига гол ёздириб қўйди.
Бироқ ғалаба йўқотишлар билан кечди: ҳимоячи Эдер Милитао жароҳат сабабли биринчи бўлим якунланмасдан майдонни тарк этишга мажбур бўлди.