Джон Генри Арне Слотга огоҳлантириш берди: Ливерпул ўртамиёналикка рози бўлмайди
Ливерпул клуби эгаси Джон Генри бош мураббий Арне Слот ва клуб раҳбариятига жиддий огоҳлантириш йўллади. У Фенвай Sports Груп (ФСГ) компанияси ҳеч қачон ўртамиёна натижалар билан кифояланмаслигини таъкидлаб, жамоа олдига юксак талаблар қўйилишини эслатиб ўтди. Бу ҳақда Goal.kom хабар беради.
Жорий мавсумда Ливерпул барча мусобақаларда 18 та мағлубиятга учради. Бу 2014-15 йилги мавсумдан буён қайд этилган энг ёмон кўрсаткичдир. Гарчи жамоа Чемпионлар лигаси йўлланмаси учун курашаётган бўлса-да, клуб хўжайини натижаларнинг пасайишидан норози эканини яширмади.
Джон Генри ўзининг бошқа спорт лойиҳаларидаги тажрибасига таяниб, мухлислар норозилиги табиий ҳол эканини, аммо раҳбарият вазифаси қийинчиликларга қарамай ғалаба қозониш учун янада кўпроқ меҳнат қилишдан иборат эканини билдирди. Унинг сўзларига кўра, клубда ўртамиёналикка ўрин йўқ.
Шу билан бирга, Арне Слотнинг келажаги борасида миш-мишлар тарқалди. Нидерландиянинг Аякс клуби мутахассисни ўз сафига қайтаришга уринган бўлса-да, Слот Ливерпул билан 2027-йилгача мўлжалланган шартномасига содиқ қолишини тасдиқлади.
Мавсум якунланиши билан Слот таркибни янгилаш ва жамоадаги барқарорсизликни бартараф этиш вазифасини бажариши керак. Олдинда турган Челси билан баҳс ва Чемпионлар лигаси йўлланмаси учун кураш нидерландиялик мураббий учун синов вазифасини ўтайди.