Каннаваро мундиал олдидан терма жамоа ҳолатини баҳолади...

Ўзбекистон миллий терма жамоаси бош мураббийи Фабио Каннаваро матбуот анжуманида Жаҳон чемпионати олдидан жамоанинг тайёргарлиги, футболчиларнинг жисмоний ҳолати, таркиб танлови ва режалар ҳақида батафсил фикр билдирди. Италиялик мутахассиснинг сўзларидан маълум бўлишича, терма жамоа тарихий мундиалга жиддий ва тизимли тайёргарлик кўрмоқда.

Каннаваро аввало футболчиларнинг жисмоний ҳолати ҳақида тўхталиб ўтди. Унинг таъкидлашича, миллий чемпионат темпи жаҳон чемпионати даражасидаги ўйинларга тўлиқ мос келмагани сабаб, лига билан келишилган ҳолда мусобақа вақтинча тўхтатилган ва терма жамоа алоҳида жисмоний тайёргарлик жараёнига киришган.

“Миллий чемпионат темпи юқори эмаслиги сабабли лига билан келишган ҳолда мусобақани вақтинча тўхтатдик ва жисмоний тайёргарлик устида алоҳида ишлашни бошладик. Машғулотларда айрим футболчилар қийналаётганини кўрдик. Лекин яхши томони — ҳеч ким шикоят қилмаяпти ва ҳар бири ўзини кўрсатиш учун ҳаракат қилмоқда”, — деди Каннаваро.

Мутахассис ўйин амалиёти кам бўлган айрим футболчиларнинг таркибга чақирилгани ҳақида ҳам изоҳ берди. Унинг айтишича, бу қарорлар мураббийлар штаби ва мутахассислар билан маслаҳатлашган ҳолда қабул қилинган. Каннаваро Ҳусайн Норчаев ва Аббосбек Файзуллаев каби футболчиларни кузатганини, ҳозирча уларнинг ўйин амалиёти кам бўлса ҳам, мундиалда жамоага фойда келтириши мумкинлигини таъкидлади.

Италиялик мураббий аввал айтган “менга жангчи футболчилар керак” деган фикрига ҳам яна бир бор ойдинлик киритди. Унинг сўзларига кўра, Жаҳон чемпионатида рақиблар жуда кучли бўлади, шунинг учун футболчилар майдонга қўрқувсиз, руҳан бақувват ва жисмонан тайёр ҳолатда чиқиши шарт.

“Мен футболчиларимнинг енгилмас ва ҳеч кимдан қўрқмайдиган бўлишини хоҳлайман. Шу маънода “отдек кучли бўлишлари керак” дегандим. Чунки рақибларимиз оддий эмас. Колумбия, Португалия ва Конго ДРга қарши ўйинлар осон кечмайди”, — деди мутахассис.

Каннаваро мухлислар кутаётган натижалар ҳақида ҳам реал фикр билдирди. Унинг таъкидлашича, халқимиз терма жамоадан катта натижалар кутмоқда, ҳатто чемпионлик ҳақида орзу қилаётганлар ҳам бор. Аммо мураббий футболчиларга ортиқча босим юкламаслик кераклигини айтди.

“Биздан жуда катта натижалар кутишяпти, ҳатто чемпионликни кутаётганлар ҳам бор. Лекин бу бизнинг илк мундиалимиз. Шунинг учун футболчиларга ортиқча босим бермаслигимиз керак. Энг муҳими — ушбу турнирдан завқ олиш. Ишонаманки, футболчилар халқимиз ва Ватан шарафи учун бор кучини беради”, — дея таъкидлади Каннаваро.

Шунингдек, мураббий стандарт вазиятлар устида ҳам жиддий иш олиб борилаётганини маълум қилди. Замонавий футболда бурчак тўплари, жарима зарбалари ва бошқа стандарт ҳолатлар ўйин тақдирини ҳал қилиши мумкин. Каннаваро бир мавсумда 15–20 та гол айнан стандартлар орқали урилиши мумкинлигини айтиб, бу йўналишга катта эътибор қаратилаётганини билдирди.

Назорат учрашувлари учун рақиблар танлови ҳам тасодифий бўлмаган. Каннаваронинг айтишича, Канада ва Нидерландия термалари мураббийлар штаби ҳамда ЎФА вакиллари билан маслаҳатлашган ҳолда танланган. Канада — мундиал мезбони сифатида ўрганиш керак бўлган муҳитга эга, Нидерландия эса ўйин услуби ва жисмоний тайёргарлиги жиҳатидан Португалияга ўхшайди.

Бу эса Ўзбекистон терма жамоасига гуруҳ босқичидаги рақибларга қарши яхшироқ тайёргарлик кўриш имконини беради. Каннаваро бошқа вариантлар ҳам бўлганини, аммо мураббийлар штаби айнан шу икки рақибни энг мақбул деб ҳисоблаганини таъкидлади.

Умуман олганда, Каннаваронинг фикрларидан терма жамоада тайёргарлик жиддий кетаяпти, деган хулоса чиқариш мумкин. Жисмоний ҳолат, стандарт вазиятлар, рақиблар таҳлили, руҳий тайёргарлик — барчаси алоҳида режа асосида олиб борилмоқда.

Ўзбекистон учун бу илк Жаҳон чемпионати. Шунинг учун йўл осон бўлмайди. Лекин Каннаваро айтганидек, асосийси — қўрқмаслик, майдонда бор кучни бериш ва халқимиз шарафини муносиб ҳимоя қилиш. Мундиал — катта саҳна. Энди футболчиларимиз шу саҳнада ўз сўзини айтишга тайёрланмоқда.