«Идел» татар һәм башкорт җыры фестивале & Зөфәр Хәйретдиновның кул чаптыру ысулы

«Идел» татар һәм башкорт җыры фестивале быел 14 нче тапкыр үткәрелә. Әлеге чараның максаты – узган ел Уфа шәһәрендә һәм аннан алдагы елларда узган конкурсларда якты эз калдырган конкурсантларның, җиңүчеләрнең талантларын күрсәтү.

Фестиваль «татар халык җыры», «башкорт халык җыры», «татар эстрада җыры», «башкорт эстрада җыры», «балалар җырлый», «академик җырлау» һәм «ансамбль» номинацияләрендә үткәрелә.

Бу конкурста катнашу өчен, яшь җырчылар, үзләренең чыгышын видеога төшереп, мөхтәрәм жюрига юллый. Конкурсның хөкемдарлары – Россиянең һәм Татарстанның халык артисты, профессор Зилә Сөнгәтуллина һәм Татарстанның халык артисты Зөфәр Хәйретдинов. Алар видеолар арасыннан иң-иңнәрен сайлап, Уфа шәһәренә концерт-конкурска чакыра. Финал җиңүчеләре әлеге бәйгенең гала-концертында чыгыш ясау һәм Бөтендөнья татар конгрессыннан бүләкләр алу мөмкинлегенә ия булачак.

Концертта яшь сәләтле артистларны күрү мөмкинлеге булгач, зал шыгрым тулы булыр, дигән уйлар белән килдем. Тик, кызганыч, алай булып чыкмады, килгән кешеләр арасында да күбесе урта һәм олы буын кешеләре иде. Югыйсә, яшьләр бер-берсен яхшырак аңларга һәм терәк булырга тиеш бит инде...

Тамашачыларны Татарстан Республикасы Дәүләт Советы депутаты, Татар конгрессы башкарма комитеты җитәкчесе Данис Фәнис улы Шакиров сәламләде.

«Идел» фестивале татар һәм башкорт мәдәнияте, сәнгате дәрьясында үзенең лаеклы урынын яулап алды. Олы сәхнәгә әле беренче адымнарын ясаучы яшь җырчыларны Татарстан һәм Башкортстанда гына түгел, халкыбыз яшәгән башка төбәкләрдән дә сайлап алабыз. Фестивальнең ноябрь аенда Башкортстан башкаласы Уфада, ә апрель аенда, бөек Тукаебызның туган көне алдыннан, Габдулла Тукай исемендәге Татар дәүләт филармониясендә узуы матур традициягә әйләнде. Бу – халыкчан фестиваль, – диде ул, һәм, әлеге бәйгенең идея авторы һәм башкаручысы Лилия Әхмәт кызы Бадамшинага рәхмәт әйтеп, чәчәк бәйләмнәре тапшырды.

Медальнең йогынтысы булырмы?

Чарада шулай ук «Татнефть» хәйрия фонды директоры Эльмира Өлфәт кызы Газизова, татар милләтенә күрсәткән олы хезмәтләре өчен, «Бөтендөнья татар конгрессы» медале белән бүләкләнде.

«Минем өчен әлеге медальне алу – бик зур дәрәҗә, хезмәтебезне югары бәяләгәнегез өчен рәхмәт! Татар конгрессы белән бергә без күп проектлар булдырабыз, алар ярдәмендә Республикабыз тагын да чәчәк атсын иде», – диде Эльмира Өлфәт кызы һәм Лилия Бадамшинага «Татнефть» хәйрия фондында басылып чыккан китапларын бүләк итте. Данис Шакиров Эльмира ханымга «Идел» фестиваленең юбилей концертына әзерләнүдә финанс яктан ярдәм кирәк булганга әлеге медаль турында онытмавы турында шаяртты. Белмим, шаяру гына булды микән бу... Юбилей концертының сыйфатыннан күрербез инде медальнең йогынтысын.

Чара дәртле татар һәм башкорт яшьләренең матур чыгышлары белән үрелеп барды. Арада «Голос» телевизион проектында финалга чыккан Казан егете – Сәид Галиуллин да бар иде. Гаиләсендә Сәидтән кала, аның абыйсы – Әмир Галиуллин да җырлый икән, концертта алар аерым җырлар да, дуэт та башкардылар.

Татарстанның халык артисты Зөфәр Хәйретдинов та тамашачыларга җырын бүләк итте. Сәхнәгә чыккач, җырчы чыгышы вакытында иң каты кул чапкан кешегә туган көн концертына 1 билет бүләк итәргә вәгъдә бирде. Халык бигрәк беркатлы инде, «дәррәү» килеп кул чапты. Соңыннан бер ак яулыклы әби, кул чаба-чаба, сәхнә төбенә үк чыкты. Җырын тәмамлагач, Зөфәр Хәйретдинов: «Менә кызыксындыру чарасы булгач – халык кул чаба, һаман туктый алмыйлар», – диде ул. Ә сәхнә янына килгән әбигә: «Апа җаным, синнән дә оста кул чабучылар булды бит. Ачуланма инде, мин мондый нәрсәне концерт саен оештырам, тик билетны барыбер беркемгә бирмим», – диде. Кемгәдер кызык булды, мин үзем бу әбине жәлләп куйдым. Алай билет белән «кызыксындырмаса», кул чапмаслар идемени инде Зөфәр абыйга?!

Гадәттә, мондый чаралар 3 сәгатьтән артык бара. «Идел» гала-концерты аерылды – сәгать ярымнан бераз гына артыграк булды. Халык та арымады, кичә дәвамында булган күтәренке кәеф белән бинадан чыгып китте.