18 ел элек Казанда суд залыннан качып киткән ир-атны быел тотканнар
18 ел элек Казанда суд залыннан бер ир-ат кача. Ул хулиганлык өчен хөкем ителергә тиеш була. Бу кеше башка шәһәргә китеп, яшеренә. Аны быел Ульяновск шәһәрендә тотканнар. Бу турыда Җәзаларны үтәтү буенча федераль хезмәтнең Татарстан буенча идарәсенә сылтама белән «Татар-информ» хәбәр итте.
Ул 2002 елда хулиганлык өчен хөкем ителгән. Суд вакытында залдан чыгып качу җаен тапкан һәм шуннан бирле ул эзләүдә булган. Качкынны быел 13 ноябрьдә тотканнар. Башта качкынны полиция хезмәткәрләре эзли, аннары бу эшне Җәзаларны үтәтү буенча федераль хезмәткә тапшыралар. Эзләү бүлеге хезмәткәрләре бу ир-атның Ульяновск өлкәсендә качып яшәвен ачыклый. Аның тора торган урынын да табалар һәм барып тоткарлыйлар.
Кулга алган вакытта бу кеше каршылык күрсәтми, аны полиция хезмәткәрләренә тапшыралар, диелә хәбәрдә.