Менделеевскида зур янгынны дүрт сәгать сүндергәннәр: чак кына зират янмый калган
Менделеевскида корыган үләнгә ут кабып, зур янгынга әйләнгән. Җил аркасында янгын 1000 квадрат метр мәйданга җәелгән.
Ут «Революция тавы» урамында урнашкан Камаш зиратына якын ук килгән, әмма янгынны туктата алганнар. Утны сүндерү дүрт сәгать дәвам иткән, дип яза «Комсомольская правда». Каза күрүчеләр юк.
МЧС янгынның сәбәбен әлегә хәбәр итми. 17 апрельдән Татарстанда янгынга каршы режим кертелә. Учак ягу тыела, шулай ук чүпләрне дә яндырырга, бакчаларда, ишегалларында ачык утта ризык әзерләү тыела.
Бу атнада коры үлән яну нәтиҗәсендә фаҗига булды инде. Марий Эл республикасының Звенигово районында 69 яшьлек хатын үз бакчасында чүп яндыра, үләнгә ут кабып, өе яна башлый. Ул күршеләрен ярдәмгә чакыра һәм өеннән кыйммәтле әйберләрне чыгара башлый һәм нәтиҗәдә һәлак була.
Мамадыш районында да коры үләннән чыккан ут каралты-кураларга күчеп, ике мунча, сараһ һәм җиңел автомобиль янды.