Югалган балыкчыларның берсен су төбеннән таптылар
Спас районы Измәр авылында булган гадәттән тыш хәл турында коткару хезмәтенә 17 апрельдә 11:55 сәгатьтә хәбәр керә.
Алдан җиткерелгәнчә, 1979 һәм 1987 елгы ир-атлар иртән үк Актай елгасына балыкка китә. Ярдан 100 метр эчтәрәк көймәләре табылса да, кешеләрен яр буйларыннан һәм водолазлар ярдәмендә кичкә кадәр сулыктан эзләү дә әлегә нәтиҗә бирмәгән иде.
Кичә 12:36 сәгатьтә коткаручылар судан – көймә табылган урыннан агым буйлап 50 метр читтәрәк, 3-4 метр тирәнлектән 1987 елгы ир-атның үле гәүдәсен табып ала. Икенче балыкчыны эзлиләр.