Ыал эһэтэ хоккейдыыр буоллаҕына
Уу Алдан улууһугар, Бороҕоҥҥо, кыһын муус турда да, Мүрү эбэҕэ хоккейдааччылар үксүүллэр. Нэһилиэк ыалын эһэлэрэ, аҕалара маннык түмсэн күрэхтэһэр, билэр дьоннорун ыҥыран, угуйан кыттыһыннарар буолбуттара хаһыс да сыла. Маныаха кинилэр суолларын батыһан, эдэр ыччаттар уонна оскуола үөрэнээччилэрэ эмиэ хоккейдыыр үгэстэммиттэр. Онон Мүрү эр дьоно спордунан үлүһүйэллэрэ атыттарга үтүө холобур буолар. Бу бэртээхэй хайысханы тэрийэр предприниматель Петр Михайлович Слепцов спорт киһиэхэ эрчими биэрэрин, тулуурдаах, дьулуурдаах, булгуруйбат модун санаалаах буоларга үөрэтэрин, киһи үтүөҕэ, кэрэҕэ тардыһара күүһүрэрин бэлиэтиир. Кини чөл олоҕу тарҕатар сыаллаах үлэтин 25 сыл анараа өттүгэр саҕалаабыт. Тыраахтарынан күттэрэн оҥорбут катогар оччолорго хаҥкыһыттар, ордук кыыс аймах, сөбүлээн мустар эбит. Ону көрө сылдьан урут хоккейдыырын санаан, эр дьону, уолаттары хаалсыһыннарбакка хамсатарга, түмэргэ быһаарыммыт.
—Дьиэ кэргэҥҥэ ыал аҕата, эһэтэ саамай сүрүн киһи. Оҕолор кинилэри көрө сылдьан холобур оҥостоллор, үтүктэллэр. Ама, хайа уолчаан аҕатын, убайын кытта тэҥҥэ сырсарыттан, күрэхтэһэриттэн, эбэтэр кинини кытта бииргэ балыктыырыттан, бултууруттан, киниэхэ көмөлөһөрүттэн үөрбэт, киэн туттубат буолуоҕай. Эбэтэр ыал эһэтэ хоккейдыыр буоллаҕына, оҕото, сиэнэ тоҕо көрөн туруохтарай. Бу буоллаҕа, уол оҕону кыратыттан эркин курдук эрэллээх, дьоһун киһи гына иитэн-такайан таһаарыы, чөл олоххо сирдээһин биир өрүтэ. Ити баҕабын барытын кумааҕыга тиһэн, былаан оҥостон улууһум дьаһалтатыгар тиийбиппин сэргээбиттэрэ, өйөөбүттэрэ. Биир саарбахтыыр тылы эппэккэ, хоккейдыыр тэрил биэрэн көмөлөспүттэрэ. Онтон нэһилиэгим дьаһалтата сир анаан, уот-күөс тардыллан, силигэ ситэн күһүн муус тоҥуоҕуттан саас хойукка диэри хоккейдыыр идэлэммиппит хаһыс да сылыгар барда. Маны сэргэ, СӨ хоккей федерациятын бэрэсидьиэнэ Олег Тарасов хаҥкылары биэрбитэ. Төрөппүттэр эмиэ өйүүллэрэ үөрдэр. Сорох наадалаахпытын улахан дьон бэйэбит атыылаһабыт. Онон билигин мууска дьиҥнээх хоккеистар курдук таҥнан-симэнэн тахсарбыт санаабытын күүһүрдэр, — диир кини чахчы да астыммыт быһыынан.
Мүрүлэр билигин үс хамаандалаахтар. Оскуола үөрэнээччилэрэ уонна ыччаттар биирдии, 35-ттэн үөһэ саастаахтар бэтэрээн оонньооччуларга киирсэннэр, икки. Саамай аҕа саастаахтара 60-гар чугаһаабыт дьон. Петр Михайлович салгыы маннык кэпсиир:
—Бэйэ икки ардыгар күрэхтэһии тиһиктээхтик ыытыллар. 2013 сылтан аһаҕас чемпионат тэрийэн, баҕалаахтары барыларын кытыннарабыт. Ону сэргээн хамаанданан күөн көрсүһэ кэлээччи, хоккейынан үлүһүйээччи элбээн иһэр. Күрэхтэһиигэ Мэҥэ-Хаҥаластан, Намтан, Дьокуускайтан, өссө куораттан биир дойдулаахтарбыт, уопсайа алта хамаанда күөн көрсөн, уоттаах-күөстээх киирсии буолбута. Билигин кэлэр сылга былааннаммыт улахан чемпионаппытыгар бэлэмнэнэбит.
Петр Слепцов үлэтин сайыннаран иһэр баҕалаах СӨ ыччат дьыалаларыгар уонна дьиэ кэргэн бэлиитикэтин, СӨ спорт министиэристибэлэригэр эдэрдэргэ уонна бэтэрээннэргэ хоккейга кэлэр сылга улахан күрэхтэһиини тэрийэр баҕалааҕын тиэрдибит. Маны сэргэ, тыа сирин ыччатыттан бастыҥ хоккеистары иитэн таһаарар сыаллаах, хоккейдыырга сабыылаах дьиэ-уот туруорсубут.
—Онно шорт-трек, хоккей, о.д.а. араас баар буолуон баҕарабын. Дьиэлэннэрбит үлэ да миэстэтэ тахсыа этэ. Манна даҕатан эттэхпинэ, улууспутуттан биир эдэр оҕону соҕуруу институкка анаан үөрэттэрэ сылдьабыт. Кини тренер быһыытынан үлэлиэ, үөрэтиэ. Оччоҕо хаһан эрэ, эдэрдэртэн чулуу хоккеистар, хаҥкыһыттар тахсыахтара. 1 из 12