Майаҕаска мааны бибилэтиэкэ малааһына буолла
Уус Алдан улууһугар, Хоро нэһилиэгэр, туһунан турар саҥа бибилэтиэкэ дьиэтэ дьэндэйдэ. Бу үөрүүнү үллэстэ ыраахтан-чугастан ыалдьыттар түмүстүлэр. Быһа түһэн эттэххэ, бу иннинэ бибилэтиэкэ кулууп иккис мэндиэмэнигэр дьукаахтаһан олорбута. Онтон туһунан бас билэр дьиэ-уот наада диэн, тутуу 2014 сылтан саҕаламмыта. Күүтүүлээх дьиэни тутан үлэҕэ киллэрэ охсор туһуттан олохтоох бүддьүөттэн 2015 сыллаахха 1 мөл. 200 тыһ.солк., 2016 сылга — 263 тыһ.тахса солк. үп көрүллүбүт. Ол түмүгэр, ааҕар саалалаах, оҕолорго уонна улахан дьоҥҥо тус-туспа абонеменнардаах, толору хааччыллыылаах, уопсайа 90 кв.м. иэннээх дьиэ үлэҕэ киирдэ.
Бибилэтиэкэ сэбиэдиссэйэ Ксения Кириллина үөрүүтүн үллэһиннэ:
— Бас билэр дьиэлэннэхпитинэ-уоттаннахпытына саҥа миэбэл наада буолар диэн, Бүтүн Россиятааҕы бибилэтиэкэ күнүгэр, акция тэрийбитим. Манна дьон-сэргэ сүрдээҕин өрө көтөҕүллэн кыттыбытын түмүгэр 72 тыһ.солк. киирбитэ. Ону сэргэ, олохтоох дьаһалта 100 тыһ.солк. көрбүтэ. Онон толору саҥа миэбэл ыламмыт үөрүүбүт улахан. Бибилэтиэкэбитигэр Аҕа дойду сэриитин бэтэрээнэ, 1945-1948 сыллардаахха ааҕар балаҕан сэбиэдиссэйинэн үлэлээбит Семен Гаврильевич Крылов аата иҥэрилиннэ. Долгутуулаах чааска кини аатын кэрэһилиир суруктаах мемориальнай дуоска аһыллынна. Манна Крыловтар күтүөттэрэ Николай Костромин аал уоту айах тутан маанылаата, алгыс баһын сыалаата. Салгыы Семен Крылов оҕолоро истиҥ эҕэрдэлэрин тиэртилэр итиэннэ аҕаларын туһунан стендэлэрин билиһиннэрдилэр. Бу күн өссө биир бэлиэ түгэнинэн, худуоһунньук Евграф Михайлович Крыловка аналлаах муннугу аһыы буолла. Мустубут ыалдьыттарга Евграф Михайлович кыргыттара үтүө-баҕа санааларын тиэртилэр уонна дьиэ кэргэн муспут кинигэлэрин бибилэтиэкэҕэ бэлэх ууннулар. Салгыы төрдүс кылаас оҕолоро кинигэ киһи бастыҥ доҕоро буоларын туһунан бэртээхэй монтаж көрдөрдүлэр. Онтон урут үлэлээбит бэтэрээннэр үлэлээбит кэмнэрин долгуйа аҕыннылар, — диэтэ Ксения Николаевна.
Умнуллубат кэрэ-бэлиэн күн нэһилиэк баһылыга Виктор Крылов, улуус дьокутааттара Леонид Сергеев, Аркадий Алексеев, нэһилиэк олохтоохторо, «Алаас кыргыттара» бэтэрээннэр, «ЧИП» («Читаем, играем, поем») уонна «Абылаҥ» коллекционердар түмсүүлэрэ ааҕааччы ахсаана элбээн иһэригэр, кэнчээри ыччат билиини биэрэр бастыҥ-мааны дьиэҕэ кэлэ турарыгар баҕарбыттар. Бибилэтиэкэҕэ аата иҥэриллибит С.Г.Крылов утумнарын кытта кыттыһан улуустааҕы, өрөспүүбүлүкэтээҕи НПК ыытар туһунан кэпсэтиини биһирээбиттэр. Дьоро киэһэ мустубут ыалдьыттар бары бибилэтиэкэ историятын кэпсиир буклеты бэлэх тутан үөрбүттэр. 1 из 7