Палітзнаволены Анджэй Пачобут даслаў ліст на волю
Палітычны зняволены, журналіст і актывіст незалежнага Саюза палякаў у Беларусі Анджэй Пачобут даслаў ліст на волю. У ім журналіст паведамляе, што яго справу павінны перадаць у Генеральную пракуратуру, адтуль — у Вярхоўны суд, а затым у адзін з абласных судоў. Куды канкрэтна — пакуль невядома. “Цяпер чакаю звестак, дзе і калі справу будуць разглядаць. Гэта чаканне можа расцягнуцца нават на два месяцы…”, — піша Анджэй.
Анджэй Пачобут быў затрыманы 25 сакавіка 2021 года ў Гародні па так званай “польскай справе” разам з іншымі актывістамі Саюза палякаў Беларусі. За артыкул пра напад СССР на Польшчу ў верасні 1939-га Пачобута абвінавацілі ў “распальванні варожасці па нацыянальнай прыкмеце”. Таксама ў матэрыялах крымінальнай справы фігуруюць іншыя журналісцкія матэрыялы. Нядаўна стала вядома, што Пачобута таксама абвінавацілі ў закліках да санкцый.
БАЖ
Artykuł Палітзнаволены Анджэй Пачобут даслаў ліст на волю pochodzi z serwisu БЕЛАРУСКАЕ РАДЫЁ РАЦЫЯ.