Մտահոգիչ է, որ ՄԽ հայտարարությունում Վիեննայի և Պետերբուրգի պայմանավորվածությունների մասին չի նշվում. Ս. Սաֆարյան
Հայաստանի և Ադրբեջանի նախագահների առաջիկա հանդիպման վերաբերյալ ԵԱՀԿ Մինսկի խմբի հայտարարության մեջ «վերաակտիվացնել» բառը քաղաքագետ Ստյոպա Սաֆարյանին տարակուսանքի տեղիք է տալիս, իսկ նախադասությունն էլ, որ «համանախագահներն ակնկալում են, որ նախագահների հանդիպումը կնպաստի կողմերի միջև վստահության և կարգավորման չլուծված մնացած առանցքային հարցերի շուրջ փոխզիջումային լուծումներ գտնելու հարցում քաղաքական կամքի ամրապնդմանը»՝ մտահոգում:
Tert.am-ի հետ զրույցում նա բացատրեց, թե ինչու. «Սա ցույց է տալիս, որ ցանկանում են առաջիկա հանդիպումների ժամանակ փորձել անդրադառնալ այդ անլուծելի մնացած մի քանի հարցերին: Սա, անկեղծ ասած, ինձ համար վերին աստիճանի վատ նշան է, որովհետև կստացվի, որ Ադրբեջանը, թերևս, հասնում է իր ուզածին: Եվ այս առումով կարծես թե հայտարարության մեջ բացատրվում է, թե ինչու էր Էդվարդ Նալբանդյանը հանկարծ սկսել կարգավորման դետալներից մեկի մասին խոսել (նկատի ունի տարածքների վերադարձի մասին հայտարարությունը)»:
Այսինքն՝ ըստ Ստյոպա Սաֆարյանի, կարելի է մտածել հայկական կողմի նահանջի մասին, որը պնդում էր, որ բանակցային սեղանի շուրջ կնստի միմիայն սանկտպետերբուրգյան ու Վիեննայի պայմանավորվածությունների կատարումից հետո։ Մինչդեռ այժմ այս նախապայմանը դուրս է գալիս և առանց այս պայմանավորվածությունների կյանքի կոչման, Ադրբեջանը փաստացի հասնում է «առարկայական բանակցություններ սկսելուն»՝ ոչ առանց Ռուսաստանի կողմից ճնշումների:
«Ուշադրություն դարձրեք, հայտարարության տեքստում Վիեննայի և Սանկտ Պետերբուրգի պայմանավորվածությունների մասին նույնիսկ բան չկա գրված: Ասեմ, որ նախորդ բոլոր հայտարարություններում այս մասին միշտ կար, երբ բառացիորեն գրվում էր՝ «որոշումները կատարելը» և այլն, և այլն: Եվ արտգործնախարարների հանդիպման արդյունքում կազմած հայտարարության այսպիսի տեքստը, թերևս, նման մտահոգության տեղիք է տալիս: Հատկապես, երբ ՄԱԿ-ի ամբիոնից Ադրբեջանի նախագահն իրեն ուղղակի խայտառակ ձևի է պահում»,-մեկնաբանեց Ստյոպա Սաֆարյանը:
Հիշեցնենք, որ Իլհամ Ալիևը ՄԱԿ-ի ամբիոնից օրեր առաջ կրկին սպառնացել էր վերստին ուժի դիմել, ինչպես մեկ տարի առաջ՝ ապրիլյան քառօրյա պատերազմի ժամանակ:
«Եվ եթե կարիք լինի, մենք կրկին կպատժենք ագրեսորին, ինչպես որ արեցինք 2016թվականի ապրիլին»,-հայտարարել էր Իլհամ Ալիևը:
Ըստ Սաֆարյանի՝ ՄԱԿ-ի ամբիոնից Իլհամ Ալիևի պահվածքը շատ ուղղակիորեն հիշեցնում է բանակցությունների գործընթացի նախկին ցիկլերի արատները, որոնք էլ «փայլուն կերպով բերեցին ապրիլյան պատերազմին»:
Հիշեցնենք, որ Մինսկի խմբի հայտարարության մեջ նաև ասվում էր. «Խորհրդակցությունների գլխավոր նպատակը հակամարտության գոտում ընթացիկ իրավիճակը քննարկելն էր, բանակցային գործընթացը վերաակտիվացնելու ուղիներն ուսումնասիրելը և Հայաստանի ու Ադրբեջանի նախագահների առաջիկա գագաթնաժողովին նախապատրաստվելը»:
Ստյոպա Սաֆարյանի համար «վերակատիվացում» բառը մի քիչ տարօրինակ է՝ հաշվի առնելով, որ ապրիլյան պատերազմից հետո տևական ժամանակ բանակցություններ չեն եղել:
Այսինքն՝ հարց է, որ թե համանախագահներն ի՞նչ ժամանակաշրջան նկատի ունեն՝ մինչև ապրիլյան պատերա՞զմը, թե դրանից հետո: Քաղաքագետի խոսքով, եթե պարզվի, որ, որ հետո, ապա հաստատ ստացվում է, որ Ադրբեջանը, առանց կատարելու միջազգային երաշխիքների մասին պայմանավորվածությունները, գնում է առարկայական բանակցությունների: