Թուրքիան դադարեցրել է քրդական Rudaw ալիքի հեռարձակումն իր արբանյակով
Թուրքիայի ռադիոյի և հեռուստատեսության բաժինը (RTUK) դադարեցրել է քրդական Rudaw ալիքի հեռարձակումն իր Turkcell արբանյակով: Այս մասին հայտնում է Rudaw ռադիոկայանը, որը մտնում է հոլդինգի մեջ:
Ռադիոկայանի տվյալների համաձայն՝ սա կապված է միջոցների հետ, որոնք Թուրքիան նախաձեռնում է Իրաքյան Քուրդիստանի դեմ՝ հանրաքվեի կապակցությամբ:
Հայտնի է, որ արբանյակի միջոցով հեռարձակում է անցկացվել Թուրքիայում և Միջին Ասիայի երկրներում: Ընդհանուր առմամբ հեռուստաալիքը հեռարձակվում է 4 արբանյակով՝ աշխարհի 160 երկրում:
Հիշեցնենք, որ երկուշաբթի՝ տեղի ժամանակով ժամը 08:00-ին, Իրաքյան Քուրդիստան ինքնավար շրջանում մեկնարկել է անկախության հարցով հանրաքվեն:
Թուրքիայի վարչապետ Բինալի Յըլդըրըմը, խոսելով հանրաքվեի մասին, դրա կայանալու դեպքում չի բացառել Թուրքիայի ռազմական միջամտությունը: Թուրքիայի վարչապետը շեշտել է, որ իրենց երկրի սահմաններին սպառնացող ցանկացած վտանգ իրենք պատրաստ են չեզոքացնել՝ առանց երկմտելու: Նա նաև հայտարարել է, որ Իրաքյան Քուրդիստանի դեմ կարող են կիրառվել տնտեսական և քաղաքական մի շարք պատժամիջոցներ:
Բացի այդ, Իրաքյան Քուրդիստանի անկախության հարցով հանրաքվեի վերաբերյալ համատեղ հայտարարությամբ են հանդես եկել ԱՄՆ նախագահ Դոնալդ Թրամփն ու Թուրքիայի նախագահ Ռեջեփ Թայիփ Էրդողանը: Երկու երկրների առաջնորդները շեշտել են, որ դեմ են Իրաքյան Քուրդիստանի անկախացմանը՝ հաշվի առնելով, որ դա Իրաքի տարածքային ամբողջականության խախտում է, ինչպես նաև կարող է վնասել Իրաքի տարածքում հակաահաբեկչական պայքարի համակարգված աշխատանքին: Թրամփն ու Էրդողանը զգուշացրել են իրաքցի քրդերին, որ նման հանրաքվեն կարող է լուրջ հետևանքներ ունենալ:
ԱՄՆ-ի, Ֆրանսիայի, Գերմանիայի և ՄԱԿ-ի ներկայացուցիչներն Իրաքյան Քուրդիստանի ղեկավար Մասուդ Բարզանիի հետ հանդիպմանն առաջարկել էին հետաձգել հանրաքվեն: Նա, սակայն, հայտարարել էր, որ հանրաքվեն կկայանա նշանակված ժամկետներում, եթե նրան այլընտրանք չառաջարկեն: Բարզանին սեպտեմբերի 14-ին հայտնել է, որ ստացել է նման այլընտրանք Արևմուտքի մի շարք երկրներից, բայց հանրաքվեի անցկացման հարցերով բարձրագույն հանձնաժողովն ավելի ուշ մերժել է առաջարկը: