Ոչ մի ոլորտում առաջընթաց չեմ տեսնում. Գևորգ Պետրոսյանը քննադատում է կառավարությանը, բայց անվստահություն ներկայացնելու հիմք չի տեսնում
Հայաստանի Սահմանադրությունն աշխարհից հետ չմնալու համար սահմանել է, որ Հայաստանը սոցիալական պետություն է, բայց, կարծես թե, կառավարությունը չի կարողանում ապահովել այս դրույթի իրացումը. Tert.am-ի հետ զրույցում նման տեսակետ հայտնեց «Ծառուկյան դաշինք» խմբակցության պատգամավոր Գևորգ Պետրոսյանը:
Ըստ նրա, սոցիալական պետություն ասելով պետք չէ հասկանալ «թվաբանություն, նկարչություն»: «Ես հասկանում եմ այն, որ ժողովուրդն ինքը պետք է զգա, որ ապրում է սոցիալական պետությունում, բայց ժողովուրդն այդ կարծիքին չէ: Իհարկե, ես այն կարծիքին չեմ եղել, որ այսինչի կամ այնինչի կողմից Կառավարության ղեկը ստանձնելու դեպքում նա կունենա կախարդական փայտիկ ու կկարողանա մի քանի ամսում կյանքը բերել ներդաշնակության, բայց որ պետական կամքի առկայության դեպքում հնարավոր է կարճ ժամանակում շատ հիմնախնդիրների գոնե մասնակի լուծումներ տրվեն՝ ես վստահ եմ դրանում»,– ասաց նա:
Նրա խոսքով՝ այսօր Կառավարությունը չի անում դա, որպեսզի մարդն իրեն պաշտպանված զգա։ «Մեր կյանքի վիճակը գնահատելու չափորոշիչներն են ժողովրդագրական վիճակ, առողջապահություն, սոցիալական ապահովում, իսկ ես ոչ մի ոլորտում առաջընթաց չեմ տեսնում, հակառակը հետընթաց եմ տեսնում, ինչի մասին չի կարելի չխոսել»,- ավելացրեց նա:
Գևորգ Պետրոսյանը նշեց, որ մեծ թափով պետական ապարատի օպտիմալացման գործընթաց է սկսվել, որը խելամիտ ձևով չի արվում: «Եթե դա արվում է մարդու սոցիալ-տնտեսական իրավունքների հաշվին, ես չեմ կարծում, որ դա նպատակահարմար է, երբ այդքան կրճատումների դեպքում մարդկանց համարժեք բան չենք առաջարկում: Եթե այդ օպտիմալացումն արվեր այն ժամանակ, երբ Կառավարությունը մինչ այդ հոգ տաներ ազատվող աշխատողների վերամասնագիտացման ուղղությամբ, դա չի արվում, ընդամենն ասում է՝ հարգելի ընկեր, դու այլևս անելիք չունես պետական համակարգում: Նրան մեզ սարքում ենք պոտենցիալ արտագաղթող, ինչն ավելի խայտառակ վիճակի է բերելու մեր ժողովրդագրական վիճակը»,- ասաց նա:
Դիտարկմանը, թե հորդորում են գոտիները ձգել, քանի որ նոր կառավարման ու բարեփոխումների հիմք է դրվում, պատգամավորը հակադարձեց. «Քաղաքացու գոտիները ձգելու փոխարեն թող կառավարությունն այնպիսի միջոցառումներ իրագործի, որ կարողանա գոնե իր ծրագիրն իրականացնել, մենք կառավարությունից շատ բան չենք ուզում, մենք ասում են՝ հարգելի՛ կառավարություն, բարի եղի՛ր, գոնե քո սահմանած ծրագիրն իրագործել, այսօր կառավարության ծրագրում ասվում է, որ հիմքում մարդն է ընկած, բայց ես չեմ տեսնում դա, միաժամանակ չեմ ասում, որ ոչինչ չի արվում, չի կարելի նաև ծայրահեղ գնահատական հնչեցնել, բայց, որ տեսանելի ոչինչ չի արվում, որը կազդի մարդկանց բարեկեցության վրա, սա անվիճելի է, պետք է լինել իրատես, կառավարությանը պահել զգոն վիճակում»:
«Ծառուկյան» խմբակցության պատգամավորը նշեց, որ քննադատության ենթարկվելն ամոթ չէ, դա ընդունված է ողջ աշխարհում: «Ես ասել եմ, որ Ազգային ժողովը սիրահարների այգի չէ, որ գնանք այնտեղ սեր խոստովանենք միմյանց: Մենք պիտի ներկայացնենք մեր տեսակետները, մենք ունենք 15 կետից բաղկացած ծրագիր, որը լուրջ մասնագիտական քննադատության չարժանացավ, այսօր ակնկալում ենք, որ կառավարությունը, նաև 2018-ին պետք է իրականացնի մեր ծրագիրը, եթե մերը չի իրականացվում, մենք ինչպե՞ս կարող ենք ողջունել կամ ծափահարել այդպիսի կառավարությանը»,-ասաց նա:
Հարցին, թե այս ամենն արձանագրելով արդյոք ճիշտ չէ՞ վարչապետին անվստահություն հայտնել, Գևորգ Պետրոսյանը պատասխանեց, թե խմբակցությունը նման իրավունք չունի, որովհետև ձայների որոշակի քանակ կա, որն իրենք չեն ապահովում։ Պատգամավորը նաև նշեց, որ ինքը կողմ չի տեսակետին, որ եթե կառավարությունը հրաժարական ներկայացրեց, եկավ նոր կառավարություն, եթե իշխող քաղաքական ուժը չի փոխվում, անձանց փոփոխություն է, այստեղ խնդիր չի կարող լուծել:
«Եթե այդ կառավարությունը պատրաստ չէ ի կատար ածել մեր դաշինքի ներկայացրած ծրագիրը, ինչ տարբերություն մեզ համար, թե ովքեր են այդ անունը կրողները. պետք է փոխվի մտածողությունը, պետք է փիլիսոփայությունը փոխվի, բարձրանա պետության և հասարակության խնդիրների նկատմամբ պաշտոնյայի մտահոգվածության աստիճանը, եթե մարդը գալիս է ԱԺ կամ գնում է Կառավարություն, ընդամենը վկայական ունենալու համար կամ աշխատանքային գրքույկը գեղեցիկ տեղեկատվությամբ լրացնելու համար, ես դա չեմ ընդունում, ստացել ես իշխանություն, բարի եղիր ճիշտ կառավարել»,– ասաց նա։
Գևորգ Պետրոսյանը նաև նշեց, որ իրենց դաշինքը հետամուտ է լինելու, որպեսզի «ժողովուրդը ճիշտ ղեկավարվի, անձանց անունների ղեկավարումը մեզ համար էական չէ»։