ირანთან დაძაბულობის ზრდის ფონზე, აშშ აფრთხილებს სპარსეთის ყურეზე გადამფრენ ავიახაზებს
აშშ-ის ავიაციის ფედერალური ადმინისტრაცია (FAA) გაფრთხილებით მიმართავს სპარსეთის ყურის წყლებზე გადამფრენ აშშ-ის კომერციულ ავიახაზებს, რომ აშშ-სა და ირანს შორის დაძაბულობის ზრდის ფონზე, არსებობს საფრთხე ისინი შეცდომით სხვა ხომალდებად მიიჩნიონ.
FAA-მა გაფრთხილება 16 მაისს გამოსცა. უწყება ამბობს, რომ გაფრთხილების ფონია "რეგიონში გაზრდილი სამხედრო აქტივობები და მომატებული პოლიტიკური დაძაბულობა, რაც აშშ-ის სამოქალაქო ავიაციის ოპერატორებს უნებლიე და მზარდ საფრთხეს უქმნის, არასწორი გათვლების და მცდარი იდენტიფიკაციის შესაძლებლობის გამო".
ბოლო დღეებში დაძაბულობა კიდევ უფრო გაიზარდა და გაჩნდა შეშფოთება აშშ-ისა და ირანს შორის სამხედრო კონფლიქტის შესაძლებლობაზე. აშშ-მა ახლო აღმოსავლეთში და სპარსეთის ყურეში თავისი სამხედრო ძალების გაზრდის ბრძანება გასცა, და ამის მიზეზად ირანისგან მომავალი შესაძლო საფრთხე დაასახელა. სახელმწიფო დეპარტამენტმა მეზობელი ერაყის დატოვება დაავალა აშშ-ის საელჩოს მუშაკებს, გადაუდებელ საკითხებზე მომუშავეთა გარდა.
ირანი უარყოფს ვაშინგტონის განცხადებებს თეირანის მხრიდან "მოახლოებულ საფრთხეებზე" და აშშ-ის ბრალს სდებს დაძაბულობის "მიუღებელ" ესკალაციაში.
ორივე მხარე აცხადებს, რომ ომი არ სურთ.