კობახიძის განცხადების მიხედვით, მელიას დაკავებაზე ჯერ კიდევ სასამართლოს განჩინებამდე მსჯელობდნენ
როგორც კობახიძე ამბობს, ნიკა მელიას დაპატიმრების ოპერაციის დროის შესახებ 17 თებერვლის 17:00 საათამდე იმდროინდელი პრემიერის გიორგი გახარიას პოზიცია ზუსტად იდენტური იმისა, რაც ჰქონდათ „ქართული ოცნების" გუნდის სხვა წევრებს. „სამწუხაროდ, რატომღაც 5 საათზე ეს პოზიცია შეიცვალა", - აღნიშნა კობახიძემ.
საქმე ისაა, რომ თბილისის საქალაქო სასამართლოს მოსამართლემ ნინო ჩახნაშვილმა ნიკა მელიასთვის აღკვეთის ღონისძიების სახით პატიმრობის შეფარდების შესახებ განჩინება 17 თებერვალს, დაახლოებით, 22:20-ზე, გამოაცხადა. მმართველი პარტიის ხელმძღვანელობას კი კობახიძის განცხადების თანახმად, 17 თებერვალს, 17:00 საათამდე, შეჯერებული ჰქონდა პოზიცია მელიას დაპატიმრების ოპერაციის შესახებ. მათ მხოლოდ 17:00 საათზე შეიტყვეს, რომ ოპოზიციური პარტიის ლიდერის დაპატიმრების ორი დღით გადავადებას მოითხოვდა პრემიერ-მინისტრი.
საპარლამენტო უმრავლესობის ლიდერის თქმით, გახარიას პოზიციის ცვლილების მიზეზი მისთვის უცნობია.
„დაფიქსირდა თავდაპირველად პოზიცია [გახარიას მხრიდან] იმასთან დაკავშირებით, რომ უნდა გადადებულიყო ეს ოპერაცია და შემდეგ საუბარი იყო 2 დღით გადადებაზე, რაც იყო ჩვენთვის გაუგებარი. მიზეზი, არგუმენტი ჩვენთვის არ იყო მყარი. არგუმენტი იყო ის, რომ თითქოს ნაკლები იქნებოდა ადამიანების კონცენტრაცია ორი დღის შემდეგ, მაშინ, როდესაც ჩვენ ლოგიკურად ვმსჯელობდით იმაზე, რომ პირიქით, კონცენტრაცია გაიზრდებოდა და ასეც მოხდა", - თქვა ირაკლი კობახიძემ და დაამატა, - „ჩვენ ზუსტად ვიცოდით, რომ გამომდინარე იქიდან, რომ ადვილად გასააზრებელი იყო ოპერაციის შინაარსი, მარტივად შეიძლებოდა იმის თქმა, რომ ყოველგვარი განსაკუთრებული გართულების გარეშე დასრულდებოდა ეს ოპერაცია".
ირაკლი კობახიძემ დააზუსტა, რომ მელიას დაკავების ოპერაციის თემაზე მმართველი პარტიის პოლიტსაბჭოს წევრებთან ერთად მსჯელობდნენ.
„ჩვენ გვქონდა გარკვეულ წრეში, ძირითადად, ეს იყვნენ პოლიტსაბჭოს წევრები, საუბრები ამასთან დაკავშირებით. კიდევ ერთხელ გავიმეორებ, რომ იყო პრემიერი, რომელსაც ჰქონდა განსხვავებული პოზიცია", - განაცხადა კობახიძემ. მან დაამატა, რომ მეორე დილით [18 თებერვალს], გადადგომამდე ესაუბრა გიორგი გახარიას, „საკმაოდ მეგობრული ტონით, მაგრამ, რაც შეეხება არგუმენტებს, აქ იყო წინააღმდეგობა". როგორც კობახიძე ამბობს, საუბარი გადადგომის შესახებ საჯარო განცხადებამდე ათი წუთით ადრე დასრულდა.
18 თებერვალს გიორგი გახარია გადადგა პრემიერ-მინისტრის თანამდებობიდან. მან გადაწყვეტილების მიზეზად დაასახელა ნიკა მელიას დაპატიმრების საკითხზე მასსა და მმართველი გუნდის სხვა წარმომადგენლებს შორის აზრთა სხვადასხვაობა.
გიორგი გახარიას გადადგომამდე „ნაციონალური მოძრაობის“ თავმჯდომარის, ნიკა მელიასთვის პატიმრობის შეფარდების შესახებ სასამართლოს მიერ მიღებული გადაწყვეტილების აღსასრულებლად ოპოზიციური პარტიის ცენტრალურ ოფისში მისული შსს-ს თანამშრომლები ოპოზიციის მხარდამჭერებმა შენობაში არ შეუშვეს.
პრემიერ-მინისტრის გადადგომის შემდეგ შსს-მ განაცხადა, რომ „ნიკანორ მელიას საქმეზე დაგეგმილი ღონისძიება დროებით გადადო". გახარიას გადადგომის შემდეგ, „ქართული ოცნების“ წინააღმდეგ გაერთიანებულმა ოპოზიციურმა პარტიებმა კვლავ მოითხოვეს ვადამდელი საპარლამენტო არჩევნების საკითხზე ხელისუფლებასთან მოლაპარაკება.
საპოლიციო ძალები „ნაციონალური მოძრაობის" ოფისთან მივიდნენ პარლამენტის მიერ პრემიერ-მინისტრად ირაკლი ღარიბაშვილის დამტკიცებიდან მალევე.
ნიკა მელია ბრალდებულია 2019 წლის 20-21 ივნისს, პარლამენტთან ანტისაოკუპაციო საპროტესტო აქციისას პარლამენტის შენობაში შეჭრის მცდელობის საქმეზე, ჯგუფური ძალადობის ხელმძღვანელობის და მასში მონაწილეობის მუხლით.
აქციაზე, რომელიც დემონსტრანტების ერთი ნაწილის პარლამენტში შესვლის მცდელობის შემდეგ მთავრობამ სპეცსაშუალებების გამოყენებით დაშალა, აპროტესტებდნენ რუსეთის დუმის კომუნისტი დეპუტატის, სერგეი გავრილოვის მიერ მართლმადიდებლობის საპარლამენტთაშორისო ასამბლეის სხდომის წაყვანას საქართველოს პარლამენტის სპიკერის სავარძლიდან.
ნიკა მელია აცხადებს, რომ მისი წინააღმდეგ ხელისუფლებას არანაირი მტკიცებულება არ გააჩნია და "ქართული ოცნება" გავრილოვის დავალებას ასრულებს.