ირაკლი კობახიძის განცხადება ენმ-ს მხარდამჭერებმა "ქართული ოცნების" ოფისთან გააპროტესტეს
"ირაკლი კობახიძე ქართველ პესკოვად [რუსეთის პრეზიდენტის პრეს-მდივანი] მოგვევლინა და კრემლის ფილიალად აქცია "ოცნების" ოფისი. ერთადერთი ადამიანი, ვინც რეგიონში საუბრობს კრემლის სამხედრო უპირატესობაზე, რომელიც რეალურად არ არსებობს, არის კობახიძე და მიდი გუნდი", - უთხრა "ფორმულას" "ნაციონალური მოძრაობის" წარმომადგენელმა, ირაკლი ფავლენიშვილმა.
ირაკლი კობახიძის განცხადების გაპროტესტების გარდა, აქციის მონაწილეთა მოთხოვნაა პატიმრობაში მყოფი საქართველოს მესამე პრეზიდენტის, მიხეილ სააკაშვილის საზღვარგარეთ სამკურნალოდ გადაყვანა.
9 თებერვალს საზოგადოებრივ მაუწყებელთან ინტერვიუში ირაკლი კობახიძემ თქვა, რომ საქართველოს ომში ჩართვის მიმართ "მანკიერი სურვილი" იზრდება, რადგან უკრაინასთან ომში "ამ ეტეპზე რუსულ მხარეს გარკვეული უპირატესობა აქვს". მისივე სიტყვებით, ბოლო 1-2 კვირის განმავლობაში უკრაინულ მხარეს არცერთი დასახლება არ აუღია, რუსულმა მხარემ მინიმუმ ბოლო 1 კვირაში 10-მდე დასახლება აიღო.
"საერთო ჯამში, ომის დაწყებამდე რუსეთს ოკუპირებული ჰქონდა ყირიმი და დონბასის ნაწილი. დღეს რუსეთს ოკუპირებული აქვს ხერსონის 80%, ასევე ხარკოვის ოლქის ნაწილი და ზაპოროჟიეს ოლქის 80%", - თქვა კობახიძემ.
უკრაინის პრეზიდენტის მრჩეველმა, მიხაილო პოდოლიაკმა, „ამერიკის ხმასთან“ ისაუბრა „ქართული ოცნების“ თავმჯდომარის ირაკლი კობახიძის განცხადების შესახებ და თქვა, რომ ქართული მხარე უნდა შეეცადოს და ომზე კომენტარები არ გააკეთოს.