აქონდროპლაზიის მქონე ბავშვების მშობლებისთვის პრემიერის განცხადება მიუღებელია - ისინი ისევ შეხვედრას მოითხოვენ
აქონდროპლაზიის მქონე ბავშვების მშობლები ისევ პრემიერ-მინისტრთან შეხვედრას მოითხოვენ. მთავრობის ადმინისტრაციის შენობასთან პერმანენტული აქციების ფონზე, ისინი მთავრობის სხდომაზე პრემიერ-მინისტრის, ირაკლი ღარიბაშვილის განცხადებას პირდაპირ ეთერში ადევნებდნენ თვალს.
პრემიერ-მინისტრის განცხადების შეფასებისას ერთ-ერთმა მშობელმა ქეთი ბეგიაშვილმა თქვა, რომ „თავს უღირსად თვლის“, რადგან პრემიერმა მათ არ მოუსმინა, ვერ გამონახა დრო მათთან შესახვედრად, რათა გაეგო, რა იყო მათი რეალური მოთხოვნა. ქეთი ბეგიაშვილის თქმით, მათ არ სჭირდებათ კვლევები და კვლევების დაფინანსება, მათ შვილებს სჭირდებათ წამლის დაფინანსება.
„კვლევა არ მჭირდება, ჩემი შვილი 14 წლის ხდება და კვლევა რომ მჭირდებოდე, მოვითხოვდი საკვლევი ცენტრების გახსნას. ჩვენი შვილებისთვის ფინანსები არ ემეტებათ, აქ პრობლემაა ფინანსები და არავითარი გვერდითი მოვლენები... ეს არის ბავშვების უფლებების დაცინვა. წელიწად-ნახევარი გვატყუებდნენ, როდესაც გვეუბნებოდნენ, რომ მოლაპარაკებები ჰქონდათ წამლის შესაძენად “, - თქვა ქეთი ბეგიაშვილმა.
ის მთავრობის ადმინისტრაციის შენობაში შესვლას ჯერ გვერდითა შესასვლელიდან ეცადა, რისი საშუალებაც სამართალდამცველებმა არ მისცეს. მოგვიანებით მშობლებმა შენობის ცენტრალური შესასვლელისკენ გადაინაცვლეს და იქიდან სთხოვდნენ პრემიერს შეხვედრას.
„მე უარით და დამარცხებული ვერ მივალ ჩემს შვილთან. რას ნიშნავს ძვირფასი მოქალაქე? როგორ მიწოდებს ძვირფას მოქალაქეს პრემიერი, როცა არ მხვდება. თუ არ არის ფინანსების პრობლემა, შეგვხდეს. 20 წუთი გამონახოს, დაგველაპარაკოს“, - თქვა აქციაზე მყოფმა მშობელმა სალომე გაბელაშვილმა.
აქციის მონაწილე მშობლები გამოეხმაურნენ პრემიერის განცხადებას იმის შესახებაც, რომ მათ გვერდით ოპოზიციური პოლიტიკური პარტიების წარმომადგენლები მხოლოდ პოლიტიკური დივიდენდების მისაღებად დგანან. ქეთი ბეგიაშვილის თქმით, 2015 წლიდან პარტია „ქართული ოცნების“ წევრია და ახლა მისი “მეგობარი ის არის, ვისაც მისი პრობლემა აწუხებს“.
პარტია "ლელოს" წარმომადგენელის, დეპუტატ ანა ნაცვლიშვილის თქმით, პრემიერ-მინისტრმა ირაკლი ღარიბაშვილმა აქციაზე მხოლოდ პოლიტიკოსები დაინახა მშობლები კი ვერ.
საქართველოს პრემიერ-მინისტრმა ირაკლი ღარიბაშვილმა მთავრობის დღევანდელ სხდომაზე განაცხადა, რომ აქონდროპლაზიის მქონე ბავშვების სიცოცხლეს საფრთხე არ ემუქრება. საქართველოს პრემიერ-მინისტრმა ასევე თქვა, რომ "ქვეყანა, სადაც ეს წამალი გამოიგონეს, თავად არ აფინანსებს".
"ჩვენ უარს არ გეუბნებით. თანხაზე არ არის საუბარი, 10 მილიონზეა საუბარი - თანხა არ არის ჩვენთვის პრინციპული და კრიტიკული. ღმერთმა დაიფაროს, თუ ამ წამლის მიცემით ისე შეიძლება გართულდეს ამ ბავშვების ჯანმრთელობის მდგომარეობა, რომ უფრო ცუდად წავიდეს, რა თქმა უნდა, ამ შემთხვევაში იქნება ჩვენი პასუხისმგებლობა. ეს, რა თქმა უნდა, არ გვინდა, რომ მოხდეს. საჭიროა მოცდა", - თქვა პრემიერმა.
მან მშობლებს მიმართა არ გამოაყენებინონ თავი პოლიტიკოსებს "ნუ მიიღებენ ამ პოლიტიკურ კამპანიაში მონაწილეობას, ნებსით თუ უნებლიეთ...",- განაცხადა ირაკლი ღარიბაშვილმა.
წელიწადზე მეტია, აქონდროპლაზიის მქონე ბავშვების დედები პრეპარატ "ვოსორიტიდის" შემოტანასა და დაფინანსებას ითხოვენ. მშობლების ნაწილი ბოლო რამდენიმე დღეა, ღამეებს მთავრობის კანცელარიასთან ათენებს. აქცია გაიმართა გუშინ, 23 აპრილსაც და დღესაც.
აქციის ორგანიზატორები აცხადებენ, რომ ეს წამალი სასიცოცხლოდ მნიშვნელოვანია აქონდროპლაზიის სინდრომის მქონე ბავშვებისთვის და მის მიღებას მხოლოდ 14-16 წლის ასაკამდე აქვს შედეგი.
საქართველოს შრომის, ჯანმრთელობისა და სოციალური დაცვის მინისტრის მოადგილის, თამარ გაბუნიას თქმით, "ვოსორიტიდის" საქართველოში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის თუნდაც რამდენიმე ქვეყანაში დადასტურდება ამ მედიკამენტით პაციენტების უზრუნველყოფა.