პროკურორის, გიორგი მუჯირის განცხადებით, სერჟანტ როინ შავაძის უკანონო დაკავების, განზრახ მკვლელობის საქმეზე შეკრებილია მტკიცებულებათა ის სტანდარტი, რომელიც დაკავებულთა ბრალეულობას ადასტურებს
პროკურორ გიორგი მუჯირის განცხადებით, სერჟანტ როინ შავაძის უკანონო დაკავების, განზრახ მკვლელობის საქმეზე შეკრებილია მტკიცებულებათა ის სტანდარტი, რომელიც დაკავებულთა ბრალეულობას ადასტურებს.
აღნიშნულის შესახებ გიორგი მუჯირმა ჟურნალისტებს თბილისის საქალაქო სასამართლოში განუცხადა, სადაც როინ შავაძის უკანონო დაკავებისა და განზრახ მკვლელობის საქმეზე პროცესი მიმდინარეობს. პროკურორის განმარტებით, ბრალდების მხარე დაკავებულების მიმართ პატიმრობის შეფარდებას განიხილავს. როგორც მან განმარტა, ბრალდებული პირები 15 წლის განმავლობაში ურთიერთშეთანხმებით მოქმედებდნენ იმისთვის, რომ მოცემული დანაშაული არ გახსნილიყო.
„15 წლის განმავლობაში კოორდინირებულად გამოძიებას ყალბი შემუშავებული ვერსიის შესაბამისად ცრუ ინფორმაციას აწვდიდნენ, რადგანაც კონკრეტულად მათი დანაშაულებრივი ქმედებები არ დადგენილიყო. აღნიშნულის გარდა, მოცემულ სისხლის სამართლის საქმეზე მოწმეზე ზემოქმედების კონკრეტული ფაქტებია, ახალი დანაშაულის ჩადენის რისკებია, ასევ არის მათი მიმალვის საფრთხე, რის გამოც ბრალდების მხარე უალტერნატივოდ, მხოლოდ და მხოლოდ, უმკაცრესი აღკვეთის ღონისძიების პატიმრობის გამოყენებას განიხილავს. ძალიან დიდი ხნის განმავლობაში ბრალდებულები არასწორ ინფორმაციას აწვდიდნენ და ეს ყველაფერი კოორდინირებულად ხდებოდა. ამისთვის შეიქმნა კიდეც სისხლის სამართლის ყალბი საქმე, იმისთვის, რომ არ მომხდარიყო მათი დანაშაულებრივი ქმედებების გამოვლინება.
აღნიშნულის გარდა მოცემული საქმე კომპლექსურია, მოიცავს რამდენიმე დანაშაულს, საქმე გვაქვს დანაშაულთა ერთობლიობასთან, ამიტომ გამოძიებას დრო დასჭირდა და სწორედ ახლა, შეკრებილია მტკიცებულებათა ის სტანდარტი, რომელიც მათი ბრალდების შესაძლებლობას ქმნის“, – განაცხადა გიორგი მუჯირმა.
მისი თქმით, საქმეზე გამოძიება გრძელდება, რომელიც მაქსიმალურად ცდილობს გამოავლინოს დანაშაულში ჩაბმული სხვა პირები. პროკურორის განმარტებით, შესაბამისი სტანდარტის არსებობის შემთხვევაში სისხლის სამართლებრივი დევნა დაიწყება ყველა იმ პირის მიმართ, რომელსაც მონაწილეობა მიუღია აღნიშნული დანაშაულის ჩადენაში.
„როინ შავაძის პიროვნებით 2008 წლის 15 აგვისტოს დაინტერესდა კონსტიტუციური უსაფრთხოების დეპარტამენტი, იმავე დღეს, ის მიყვანილიც იყო კონსტიტუციური უსაფრთხოების დეპარტამენტის შენობაში, თუმცა გამოუშვეს. მეორე დღეს კონსტიტუციური უსაფრთხოების დეპარტამენტის თანამშრომლები მივიდნენ იმ სამხედრო ნაწილის ტერიტორიაზე, სადაც ის მსახურობდა. იქაც ნახეს და წინასწარ მოიკვლიეს. ხოლო მისი უშუალოდ დაკავება და ფიზიკური ანგარიშსწორება მოხდა ქალაქ ბათუმში, საზოგადოებრივი თავშეყრის ადგილზე, ყველას თვალწინ. საქმეში იკვეთება მოტივი, რომ თითქოს როინ შავაძე უცხოეთის სპეციალურ სამსახურებთან თანამშრომლობდა. მსგავსი ინფორმაცია არ დადასტურებულა არც იმ პერიოდში და არც მომდევნო და არც მიმდინარე გამოძიების პერიოდში. როინ შავაძე იყო საქართველოს შეიარაღებული ძალების სერჟანტი. ის მონაწილეობდა ერაყის მისიაში და აგვისტოს ომში. სამსახურებრივი მოვალეობის შესრულებისთვის მედლითაც იყო დაჯილდოებული და მსგავსი ინფორმაცია არცერთ ეტაპზე არ დადასტურებულა. საბოლოო ჯამში, თუ რას ემყარებოდა მათი პოზიცია, რომ როინ შავაძე სამშობლოს მოღალატე იყო, მსგავსი რამ არც გამოკვეთილა, არც მათი მხრიდან დადგენილა და არც სისხლის სამართლის საქმეში არ მოიძებნება“-განაცხადა გიორგი მუჯირმა და აღნიშნა, რომ მომხდარი როინ შავაძის მიერ გაკეთებულ რომელიმე განცხადებას ან გამოთქმულ მოსაზრებას უკავშირდებოდა თუ არა, ეს არც გამოძიების მიერ არ არის დადგენილი.
ამასთან, პროკურორის განმარტებით, აჭარის მაშინდელმა კონსტიტუციური უსაფრთხოების დეპარტამენტის უფროსმა დავალება მიიღო ამავე დეპარტამენტის ხელმძღვანელ დავით ახალაიასგან იმისათვის, რომ შავაძეზე ოპერატიული თვალთვალი ეწარმოებინა, ხოლო შს მინისტრი იყო ივანე მერაბიშვილი. როგორც პროკურორმა აღნიშნა, შემდგომი გამოძიების საგანია, თუ ვინ იყო ჩართული აღნიშნულ დანაშაულში.
ცნობისთვის, თავდაცვის სამინისტროს ბრიგადის სერჟანტის, 2008 წლის აგვისტოს ომის მონაწილის, როინ შავაძის უკანონო დაკავების, განზრახ მკვლელობის და სამსახურებრივი უფლებამოსილების გადამეტების ბრალდებით პროკურატურამ სისხლისსამართლებრივი დევნა 10 პირის მიმართ დაიწყო, მათგან 8 პირია დაკავებული, ორი პირის – იმჟამინდელი კონსტიტუციური უსაფრთხოების დეპარტამენტის აჭარის ავტონომიური რესპუბლიკის მთავარი სამმართველოს უფროსის, თეიმურაზ პატარიძისა და ყოფილი სპეცრაზმელის, გიორგი არაბულის მიმართ კი ძებნა გამოცხადდება.
ბრალდებული პირების სისხლის სამართლებრივ პასუხისგებაში მიცემას სტრასბურგის სასამართლოს გადაწყვეტილება დაედო საფუძვლად, რომლის მიხედვითაც, „შავაძე საქართველოს წინააღმდეგ“ ევროპული კონვენციის მე-2 მუხლის, კერძოდ – სიცოცხლის უფლების როგორც პროცედურული, ასევე არსებითი ნაწილის დარღვევა დადგინდა. აღნიშნული გადაწყვეტილების აღსრულებაზე და გამოძიების მსვლელობაზე ზედამხედველობას ევროპის საბჭოს მინისტრთა კომიტეტი ახორციელებდა.
პროკურატურის ინფორმაციით, საქმე ეხება 2008 წელს მომხდარ ფაქტს, რა დროსაც, როინ შავაძეს „კუდ-ის“ თანამშრომლები, ბათუმის ერთ-ერთ კაფეში, ჯერ კონდახებით გაუსწორდნენ, შემდეგ კი უმწეო მდგომარეობაში მყოფი ქობულეთის და გურიის საზღვართან მრავალჯერადი გასროლით მოკლეს.
ბრალდებულების მიმართ სისხლისსამართლებრივი დევნა საქართველოს სისხლის სამართლის კოდექსის 109-ე მუხლის მე-2 ნაწილის „ბ“ და „ე“ ქვეპუნქტებით (ჯგუფურად ჩადენილი, დამნაშავისათვის წინასწარი შეცნობით უმწეო მდგომარეობაში მყოფის განზრახ მკვლელობა), სსკ-ის 147-ე მუხლის მე-3 ნაწილით (განზრახ უკანონო დაკავება, რამაც მძიმე შედეგი გამოიწვია) და სსკ-ის 333-ე მუხლის მე-3 ნაწილის „ბ“ და „გ“ ქვეპუნქტებით (სამსახურებრივი უფლებამოსილების გადამეტება, ჩადენილი ძალადობით ან იარაღის გამოყენებით და დაზარალებულის პირადი ღირსების შეურაცხყოფით) დაიწყო.
სისხლის სამართლის საქმეზე, გამოძიება გრძელდება საქართველოს სისხლის სამართლის კოდექსის 109-ე (განზრახ მკვლელობა), სსკ-ის 147-ე (განზრახ უკანონო დაკავება) და სსკ-ის 333-ე (სამსახურებრივი უფლებამოსილების გადამეტება) მუხლებით.