Байсалов: Өкмөткө ишеним калган жок, кызматтан кетсин
- Аны өз күчүбүз менен эле жасабайлыбы десек алар “биз жакшы билебиз, ойлондук, эл аралык тажрыйбаны эске алдык” деп кайра бизди мазактап, жаман көрсөтүшкөн. Эми ким ишенет? Артынан ким ээрчийт? Ишенимден таптакыр чыкты. Өз ыктыяры менен кетиши керек. Кетпесе, өкмөттүк кризис деп буга чейин айтып жаттык эле, тез арада жаңы өкмөт түзүүнү Жогорку Кеңеш демилге көтөрүшү керек.
Кыргыз өкмөтү «Акылдуу шаар» инвестициялык долбоору боюнча милдеттенмелер аткарылбаганына байланыштуу кытай тарап менен түзгөн келишимден чыгууну чечкени бүгүн расмий жарыялады. Мындай чечим “келишимде жазылган мөөнөт сакталбагандыгына, тагыраак айтканда, долбоорду ишке ашыруу боюнча документтер сапатсыз даярдалышына байланыштуу” кабыл алынганы айтылды.
«Биз инвесторлордун ресурстарын жана мүмкүнчүлүктөрүн пайдаланууну көздөгөнбүз, бирок тең-инвесторлор долбоорду ишке ашырууну создуктуруп, ал эми биздин жарандардын жолдогу коопсуздугун камсыздоо абалы татаал бойдон кала бергендигине байланыштуу бул долбоорду өз күчүбүз менен ишке ашырууну чечтик», - деди Инвестицияларды алга жылдыруу жана коргоо боюнча агенттиктин директору Эсен Момункулов.
Кыргыз өкмөтү "Акылдуу шаар" долбоорун ишке ашыруу боюнча кытайлык "Huawei Technologies" компаниясы менен эки ай мурда келишимге кол койгон. Жалпы баасы 60 миллион долларлык долбоордун алкагында өлкөдөгү эки шаар жана үч кан жолго көзөмөл камералары орнотулары айтылган. (TSh/RK)