Конституциялык сот бейөкмөт уюмдар мыйзамы боюнча бүтүмүн жарыялады
Конституциялык сот “Бир дүйнө Кыргызстан” укук коргоо кыймылынын бейөкмөт уюмдар тууралуу мыйзам боюнча өтүнүчүн карап чыгып, ал мыйзам Конституцияга карама-каршы келбейт деген бүтүмгө келди.
Соттук отурум бүгүн 7-июнда өтүп, анда аталган кыймылдын “Коммерциялык эмес уюмдар жөнүндө” мыйзамдын жаңы редакциясындагы үч берене боюнча өтүнүчү каралды. Кыймыл бул беренелер өлкөнүн Конституциясынын беш беренесине карама-каршы келет деп, аларды жокко чыгарууну өтүнгөн.
“Конституциялык сот “Коммерциялык эмес уюмдар жөнүндө” мыйзамдын нормалары Конституцияга каршы келбейт деп тапты. Ошону менен катар Министрлер кабинетине бейөкмөт уюмдардын салык органына маалымат берүү тартибин жөнгө салуу жана юридикалык жактардын андай маалыматты берүүдө, аны салык мекемесинин сайтына жарыялоодо теңсиз абалда калышына алып келүүчү нормаларды жокко чыгаруу тапшырмасы берилди”, - деп айтылды кыймылдын маалыматында.
2021-жылдын 17-июнунда “Коммерциялык эмес уюмдар жөнүндө” мыйзам кезектеги өзгөрүүгө дуушар болгон. Ага ылайык, коммерциялык эмес уюмдун кирешеси, мүлкү, чыгымдары коммерциялык сыр деп эсептелбейт жана уюмдар кошумча отчет берип турууга милдеттендирилет.
2022-жылдын 17-июнунда “Бир дүйнө Кыргызстан” бул мыйзам Конституцияга каршы келери тууралуу өтүнүч менен Конституциялык сотко кайрылган, алгачкы соттук отурум быйыл 17-майда өткөн. Арызданган тарап жаңы нормалар түйшүк жараткан мүнөзгө, басмырлоочу багытка ээ экенин, бейөкмөт уюмдарды кошумча убарага саларын жана жарандардын тең мүмкүнчүлүктөргө, биригүү эркиндигине болгон укуктарын чектей турганын белгилеген. Уюм коммерциялык эмес уюмдар ансыз деле башкалар сыяктуу мамлекеттик органдарга отчет берип турарын айткан. (RK)