Лидерската меѓу Заев и Мицкоски утревечер во Влада
Лидерската средба меѓу премиерот и претседател на СДСМ, Зоран Заев и претседателот на ВМРО-ДПМНЕ, Христијан Мицкоски ќе започне утревечер во 20 часот во Владата, информираше денеска Заев.
Тој вели дека на средбата ќе се разговара за претстојните претседателски избори, реформските закони и сè што е во интерес на државата.
„Ќе почекам утре да видам кои се барањата, ќе ги соопштам и нашите предлози и сите заедно како одговорности на сите политичари и политички партии ќе разговараме. За деталите е преурането и не би ги коментирал“, изјави Заев.
На оваа средба не се поканети лидери на другите парии, оти, како што вели Заев, нема потреба од таков формат.
Утрешната лидерска е на барање на ВМРО-ДПМНЕ, откако на владина седница помина законот за јавно обвинителство со кој се регулира и статусот на СЈО. Мицкоски рече дека на средбата со Заев ќе разговараат за СЈО, претстојните избори и за реформските закони.