Новости за 05.08.2019

Претседателот Стево Пендаровски го потпиша указот за прогласување на Законот за ратификација на Договорот меѓу Северна Македонија и Србија за воспоставување заеднички контроли на граничниот премин за меѓународен патен сообраќај Табановце - Прешево, соопштија од Кабинетот на претседателот. Според соопштението, Пендаровски смета дека воспоставувањето на заедничките контроли позитивно ќе придонесе за натамошното унапредување на билатералната комуникација меѓу Република Северна Македонија и Република Србија... Читать дальше...

Мнозинството од анкетираните Шкоти би гласале за независност од Обединетото Кралство, покажуваат резултатите од истражувањето на јавното мислење спроведено по барање на лорд Мајкл Ашкроф, што е прво поголемо испитување на јавното мислење од март 2017 година. Од 1.019 испитаници, наспроти 46 отсто кои се „за”, „против” би гласале 43 проценти. Исклучувајќи ги оние кои не знаат како ќе гласаат, тоа прерасна во предност од 52 наспроти 48 отсто во корист на приврзаниците на независноста на Шкотска.... Читать дальше...

Турскиот претседател Реџеп Таип Ердоган го повтори барањето за продолжување на прекуграничните операции во североисточна Сирија. Разговорите меѓу турските и американските претставници во врска со овие операции запнаа околу прашањето за формирање безбедносна зона на територијата на Сирија источно од реката Еуфрат каде што жиеват Курди за кои Анкара смета дека се закана за Турција. Курдите во Сирија се помогнати од САД во борбата против екстремистичката Исламска држава.

Најмалку 19 луѓе загинале, а 30 други биле ранети во експлозија во близина на Египетскиот институт за канцерогени заболувања во Каиро. Властите соопштија дека автомобил се судрил со три други возила при што дошло до експлозија. Се уште не е јасно дали станува збор за терористички напад. Експлозијата предизвикала штети и во зградата на Институтот.

Јужнокорејската војска соопшти дека маневрите со американските сили ќе се одржат и покрај предупредувањата од Северна Кореја дека вежбите би можело да ги наруши нуклеарните преговори меѓу Пјонгјанг и Вашингтон. На маневрите ќе се тестираат јужнокорејските способности за потенцијално преземање на операциската контрола од Вашингтон за време на војна. До маневрите доаѓа откако Северна Кореја тестираше три ракети со краток дострел.

Сообраќајот во Хонг Конг денеска е во застој, а над 100 летови се откажани поради штрајкот организиран од продемократските активисти. Лидерот на Хонг Конг Кери Лем изјави дека штрајкот го доведува градот во „многу сериозна ситуација“ и го намалува неговиот суверенитет со оглед на заканите од Пекинг дека ќе испрати војници за да се справи со демонстрантите. Во овој важен азиски финансиски центар веќе неколку недели се одржуваат протести против кинеската влада.

Американскиот претседател Доналд Трамп ги осуди двете масовни убиства во САД во текот на викендот, наведувајќи дека „омрзата нема место во земјата“. Тој истоа така рече дека Вашингтон ќе преземе акции за решавање на проблемот. Во пукањата во Ел Пасо, Тексас и Дејтон, Охајо загинаа најмалку 29 луѓе, додека десетина други беа ранети. Во Ел Пасо 21 годишен напаѓач стрелал во еден трговски центар. Наводно тој претходно оставил манифест со расна содржина. Мотивите на 24 годишниот напаѓач во Дејтон се уште се истражуваат.

Ќе биде сончево со мала до умерена облачност и со слаб до умерен северен ветер кој долж Повардарието краткотрајно ќе засилува. Утринската температура ќе биде од 10 до 20, а дневната од 22 до 34. Во Скопје и околината слично време. Утринската температура ќе биде околу 16, а дневната ќе достигне до 31 степен.