مهدي حسن: په شمالي وزیرستان کې د ښوونځیو ورانول دې وڅېړل شي
د پاکستان د بشري حقونو د خپلواک کمېسیون مشر ډاکټر مهدي حسن د یوې خبرپاڼې د خپرولو په ترڅ کې په شمالي وزیرستان کې د ښوونځیو ورانول غندلي او ویلي یې دي چې د پاکستان حکومت دې په شمالي وزیرستان کې د نجونو پر ښوونځیو د ترسره شویو بریدونو په اړه شفاف تحیقات وکړي او پایلې دې یې له خلکو سره شریکې کړي او په خبره یې، ریاست په قانوني او اخلاقي توګه په دې مکلف دی چې په پاکستان کې د هر ماشوم ښوونځي ته تګ یقيني کړي.
دا په داسې حال کې ده چې د راپورونو له مخې، دشمالي وزيرستان د ميرعلي په خسوخېلو او موساکي سيمو کې په تېرو څو ورځو کې د نجونو دوه ښوونځي په بمونو ړنګ شوي او یوې مشکوکې وسله والې ډلې د سيمې خلکو ته ګواښ کړی چې سترې نجونې دې ښوونځي ته نه لېږي.
د راپورونو له مخې، یوه وسله واله ډله چې ځان اتحاد المجاهدين شمالي وزيرستان بولي، په سيمه کې يې په اردو ژبه ليکل شوي خطونه غورځولي چې پکې دړکه شوې چې د هغو ښوونځیو مالکان به په نښه کوي چې د لوی عمر جينکۍ پکې زده کړې کوي.
شمالي وزیرستانافغان پولې ته څېرمه پرته قبایلي سیمه ده چې د پوځ تر عملیاتو مخکې پکې د پاکستاني طالبانو، القاعدې او افغان طالبانو په ګډون، د ګڼ شمېر وسله والو ډلو مرکزونه موجود وو او وخت ناوخته پکې پر ښوونځيو، امنیتي ځواکونو او نورو دولتي ودانیو بریدونه ترسره کېدل.