بریټانیا او امریکا د څار سازمان د پیاوړي کولو غوښتونکي شول
دوی دا غوښتنه پهدې هدف مطرح کړې چې د کیمیاوي وسلو پرسر د څار سازمان پيدا کړي چې څوک د توکسین بریدونو تر شا دي.
توکسین زهرجن مواد دي چې د کیمیاوي وسلو په بریدونو کې کارول کېږي.
د بریتانیا د بهرنیو چارو وزیر بوریس جانسون پرون په هاګ کې د کیمیاوي وسلو پر سر د څار سازمان له مشرانو سره پهدې اړه خبرې کړي.
هغه ویلي هیله مند یو هېڅکله د مرګ دا خطرناکه وسایل ونه کارول شي خو د ده په خبره خواشینونکې دا ده چې بیا هم کیمیاوي وسلې کارول شوي او دا چاره روانه ده.
سوریه تورنه ده چې په اپریل میاشت کې یې په دوما کې سارین او کالورین ګاز کارولي او څلوېښت کسان یې وژلي.
اوس تمه ده چې د کیمیاوي وسلو پر سر د څار سازمان پهدې اړه نوی رپوټ هم خپور کړي.
خو د بریتانیا غوښتنه چې د کیمیاوي وسلو پرسرد څار سازمان دې غښتلی شي او د زهرجنو موادو کاروونکي وپېژني د روسیې غبرګون پارولی.
روسي چارواکو ویلي، د دوما تور جعلي دی او تر څنګ یې دا حق یوازې د ملګرو ملتونو امنیت شورا لري چې پرېکړه وکړي څوک پړ دی.
د بریتانیا په وړاندیز به نن د بندو دروازو تر شاه په امنیت شورا کې رایه اچونه وشي.