ټرمپ وایي، د فدرالي ادارو د پرانیستلو لنډمهاله جوړجاړی نه کوي
د سپېنې ماڼۍ ویاندې سارا سنډرز له خوا په دې اړه د پنجشنبې په ورځ دا بیان په داسې حال کې خپور شو چې د امریکا په سنا کې د جمهوري غوښتونکو مشر میچ مکانیل او د ډموکراټانو مشر چوک شومر خپلو کې یو جوړجاړي ته د رسېدو لپاره سره وکتل.
پرون پنجشنبه د امریکا سنا د تړل شویو فدرالي ادارو د بېرته پرانیستو لپاره د رقیبو جمهوري غوښتونکو او ډموکراټانو پېشنهادونه رد کړل.
د امریکا یو شمېر فدرالي ادارې له څلور دېرشو ورځو راهېسې تړلي چې دا د دې هېواد په تاریخ کې د یوې برخې فدرالي ادارو تر ټولو اوږده رخصتي بلل کېږي.
د دې ادارو شااوخوا اته سوه زره کارکوونکو په تېرو څو اوونیو کې تنخواګانې نه دي اخیستي.