رحیمي: جنرال جرئت باید خپل وسله وال کسان پولیسو ته تسلیم کړي
د کورنیو چارو وزارت سرپرست ویاند نصرت رحیمي پرون دوشنبه په یوه ویډیویي پیغام کې وویل چې ښاغلی جرئت دې د دغه وزارت وسلې او وسایط هم بېرته ورکړي.
ده وویل:
"څو تنه غیر مسؤل وسله وال چې په کابل کې د عامه نظم او د قانون د ماتولو سبب کېږي، له ښاغلي جنرال دین محمد جرئت سره دي، د کورنیو چارو وزارت ورڅخه غواړي چې وسلې او پوځي وسایط له خپلو غیر قانوني وسله والو کسانو سره په ۷۲ ساعتونو کې د کابل پولیسو ته تسلیم کړي."
د ښاغلي رحیمي په خبره، جنرال جرئت د افغانستان د کورنیو چارو وزارت څو میله سپکې او درنې وسلې له ځانه سره لري.
هڅه مو وکړه چې په دې اړه د جنرال دین محمد نظر واخلو، خو بریالي نه شو.
نوموړي د افغانستان د ولسمشر اشرف غني د سلاکار او د ملي امنیت شورا د دفتر د مرستیال په توګه دنده ترسره کړې ده.
ولسمشر غني د تېر کال په اکتوبر کې له دواړو دندو ګوښه کړ.