یوناما په کابل کې پرونی برید د نه منلو وړ وباله
په افغانستان کې د ملګروملتونو مرستندوی دفتر په کابل کې د پرونۍ چاودنې په اړه په غبرګون کې ویلي چې دا ډول حملې د منلو وړ نه دي. په کابل کې د بهرنیو چارو وزارت د ودانۍ مخې ته په پرونۍ چاودنه کې د یو ماشوم په ګډون شپږ کسان ووژل شول. یوناما پرون په دې اړه په یوه ټویټ کې وویل، دا د منلو وړ نه ده چې پر افغانانو د عادي ژوند په حال کې حملې کېږي. د پرونۍ حملې مسوولیت داعش ډلې منلی. پر افغانستان د طالبانو له واکمنېدو وروسته د اکثر دې ډول تروریستي حملو مسوولیت داعش ډلې منلی دی.