ټرمپ: د اوکراین له ولسمشر سره شوې ټلیفوني مکالمه مناسبه وه
د امریکا د جمهور رئيس پخواني مرستیال جوبایډن غوښتنه کړې چې جمهور رئیس ډونالد ټرمپ د اوکراین له ولسمشر ولادیمیر زيليسنکي سره د خپلې هغې ټيليفوني مکالمې متن خپور کړي چې د رپوټونو پر اساس، ټرمپ د اوکراین پر ولسمشر فشار راوستی چې د جوبایډن او د هغه د زوی په اړه تحقیقات وکړي.
د جوبایډن زوی په اوکراین کې تجارتي معاملې درلودې.
جوبایډن د سپټمبر په شلمه په یوه بیان کې وویل چې ډونالد ټرمپ باید په بیړه له زيليسنکي سره د خپلو خبرو متن خپور کړي او د امریکا خلکو ته د قضاوت کولو موقع ورکړي.
جوبایډن اوسمهال په سیاسي مبارزه لګیا دی او غواړي چې له ډموکرات ګونده د کاندیدۍ موقع وګټي.
جوبایډن غواړي چې په ۲۰۲۰ میلادي کال کې د ډموکرات ګوند د کاندید په توګه د جمهوري ریاست په ټاکنو کې د ډونالد ټرمپ په وړاندې ودرېږي.
خو ولسمشر ټرمپ پرون د سپټمبر په یویشتمه پر ټوېټر ولیکل چې له زيلينسکي سره یې هېڅ داسې خبره نه ده کړې چې غلطه وګڼل شي.
د دې میاشتې په پیل کې د امریکا د استازو مجلس درېیو کمېټو وویل چې په دې اړه چې ډونالد ټرمپ او د هغه شخصي وکیل رودي ګیلیاني د اوکراین پر حکومت فشار راوستی چې د جمهور رئیس د بیا ټاکنې په کمپاین کې همکاري وکړي، تحقیق کېږي.