بریتانیا کې د ۳۹ مړو لېږدوونکي موټر ډرېور د انسان پر قاچاق او قتل تورن شو
موریس رابنسن ۲۵ کلن او د ایرلنډ اوسېدونکی دی او پولیسو د اکټوبر په ۲۵مه ونیوه.
پر نوموړي په ۳۹ مواردو کې د انسان د قتل، د انسانانو د قاچاق، د پيسو سپینولو او د غیرقانوني مهاجرت د دسیسې تور لګېدلی دی.
د بریتانیا پولیسو هغه موټر چې له بلجیمه ورغلی او ۳۹ مړي په کې بار وو، د ټایمز سیند ته نږدې پیدا کړ.
پولیسو ویلي، موریس رابنسن به د دوشنبې په ورځ محکمې ته حاضر شي.
له دې پېښې سره پولیسو درې نور مشکوک وګړي هم نیولي چې په توقیف کې دي.
د بریتانیا پولیسو په ابتدا کې داسې ګڼلې وه چې په کانټینر کې ټول مړي چینايي وګړي دي، خو اوس داسې ګڼل کېږي چې یوشمېر ویتنامیان هم په کې دي.