طالبان ښځینه ډاکټرانو ته: خپلو دندو ته را وګرځئ
په هغه اعلامیه کې چې د طالبانو د ادارې د روغتیا وزارت خپره کړې ده روغتیاپالو ښځو ته ډاډ ورکړل شوی چې د دوی لپاره د کارکولو هېڅ ډول ممانعت نه شته.
په بیان کې راغلي دي چې د روغتیا وزارت ښځینه کار کوونکې دې په منظم ډول خپلو دندو ته حاضرې شي.
طالبانو په نوېیمه لسیزه کې په خپله تېر ځل واکمنۍ کې د روغتیا وزارت په ګډون په هېڅ یوه دولتي اداره کې ښځو ته د کار اجازه نه ورکوله، خو د طالبانو ویاند ذبیح الله مجاهد په خپل لومړني خبري کنفرانس کې ډاډ ورکړ چې ښځو ته به د شریعت په چوکاټ کې د کار اجازه وي.
تراوسه پورې معلومه نه ده چې طالبان به ښځو ته په نورو برخو کې هم د کار اجازه ورکړي که نه.