کرکټ؛ افغان ملي لوبډله خپله دوهمه دوستانه لوبه له وېسټ انډیز سره کوي
د کرکټ بورډ د رسنیو د برخې مسؤل او ویاند فرید هوتک ازادي راډیو ته وویل: "د افغانستان د کرکټ ملي لوبډله به د نړیوال جام تمریناتي سیالیو په لړ کې خپله دوهمه لوبه له وېسټ انډیز کرکټ ملي لوبډلې سره وکړي او د افغانستان رسمي لوبې به د اکټوبر له ۲۵مې پیل شي."
افغانستان نړیوال جام ته د چمتووالي لپاره خپله لومړۍ لوبه د دوشنبې په ورځ جنوبي افریقا ته وبایلله.
د دې جام لومړی پړاو لوبې د یکشنبې په ورځ پیل شوې چې د دې مرحلې له اتو لوبډلو به څلور دوهم پړاو ته لاره کوي او بیا به د افغانستان په ګډون سر له شنبې له اتو نورو ټیمونو سره په دوو ګروپونو کې سیالۍ سره کوي.
دا لوبې په متحده عربي اماراتو او عمان کې ترسره کېږي. پایلوبه به د نومبر په ۱۴مه وي.